कनकाई खबर \ निजी विद्यालयहरुको संस्था प्याब्सन कनकाई नगर समितिका सल्लाहकार एवं प्यारागन एकाडेमीका प्रिन्सिपल डिआर सुवेदीको निधनप्रति श्रद्धासुमन अर्पण गर्दै कनकाई प्याब्सनले आज एक दिन शोक विदा गर्ने निर्णय गरेको छ ।
प्याब्सन कोशी प्रदेश कार्यसमितिका पुर्व सदस्य समेत रहेका शिक्षासेवी सुवेदीको हिजो सोमबार साँझ ७ः२० बजेको समयमा सवारी दुर्घटनामा परी निधन भएको खबरले प्याब्सन कनकाई नगर समिति स्तब्ध बनेको यस दुखद घडीमा कनकाई नगर क्षेत्रका सम्पूर्ण निजी विद्यालयहरुमा शोक विदाको निर्णय गरिएको प्याब्सन कनकाईका अध्यक्ष विनोद सुव्वाले जानकारी दिए ।
झापाको कनकाई—८सितल चोक स्थित पूर्व पश्चिम राजमार्गमा पश्चिमबाट पूर्व तर्फ जाँदै गरेको (ग) १ (च) ३२४८ नम्बरको बोलेरो गाडी र बिपरीत दिशातर्फ आउँदै गरेको प्र.१–०१–०१३ (प)१४१७ नम्बरको मो.सा. एक आपसमा ठक्कर खाई दुर्घटना भएको थियो ।
सोही अवस्थामा मो.सा. चालक लायन्स क्लव अफ कनकाई सुरुङ्गाका निवर्तमान अध्यक्ष समेत रहेका प्यारागन एकाडेमीका प्रिन्सिपल ५४ वर्षीय (डिआर) देबराज सुबेदी गम्भिर घाईते भई उपचारकोलागी बिएण्डसी अस्पताल पठाईएकोमा अस्पताल पुर्याउनासाथ डाक्टरले मृत घोषणा गरेको बताइएको छ ।
सुवेदीको शव हाल अस्पतालमै रहेको र आवश्यक प्रक्रिया पूरा गरेर पोष्टमार्टमकालागी मेची प्रादेशिक अस्पताल लाने तयारी भइरहेको बताइएको छ । श्रीमति र एक छोरा साथै प्यारागन एकाडेमीका एक जिम्मेवार अभिभावक समेत रहेका सुवेदीको निधनले यहाँको शिक्षा क्षेत्रमा ठूलो क्षति पुगेको प्याब्सनका केन्द्रिय सदस्य एवं पशुपति अंग्रेजी माविका प्रिन्सिपल एल.पी. उप्रेतीले कनकाई खबरलाई बताए ।
सुवेदीको अप्रत्यासित निधनप्रति दुःख व्यक्त गर्दै मन्टेश्वरी एसोशिएसन अफ झापाका अध्यक्ष एवं हाम्रो पाठशालाका संस्थापक प्रिन्सिपल अखिलकुमार कोइरालाले श्रदासुमन अर्पण गर्दै संस्थागत विद्यालयबाट शिक्षामा अभ्यास गरिरहेका सुरुङ्गाका एउटा सक्रिय, प्रिय, मिजासिलो, आफ्नो विचारमा स्पष्ट र दृढ पात्र गुमाउनु परेकोमा आफू अत्यन्तै दुःखी भएको बताए । कोइरालाले भने, “हाम्रो निम्ति यो क्षति अपुरणीय छ, उहाँको स्वर्गमा बास होस् ।”
स्व.सुवेदीप्रति कनकाई खबर डटकम साथै कनकाई खबर साप्ताहिकका तर्फबाट सम्पादक एवं प्रकाशक रामप्रसाद निरौला सहित सपरिवारका तर्फबाट हार्दिक श्रद्धाञ्जली अर्पण गर्दै शोकसन्तप्त परिवारजनप्रति धैर्यधारण गर्ने ईश्वरीय शक्ति प्राप्त होस् भन्ने कामना गरिएको छ ।
