कनकाई खबर \ झापाको कनकाई —३ स्थित सुरुङ्गामा रहेको पृथ्वी बचत तथा ऋण सहकारी संस्थाको ११ औं वार्षिक साधारण सभा सम्पन्न भएको छ ।
समग्र आर्थिक व्यवस्थापनका आधारमा यस क्षेत्रकै उत्कृष्ट सहकारीका रुपमा स्थापित पृथ्वी सहकारीमा हाल पनि १ करोड ३ लाख १६ हजार ८ सय ४३ रुपैयाँ जगेडा कोषमा रहेको यो संस्था सहारा नेपालसँग एकीकरणमा पुगेको हो । आर्थिक पारदर्शीता एवं सुशासन कायम रहेको पृथ्वी सहकारी आँफैमा अब्बल दर्जाको संस्था भएकाले अन्य जुनसुकै सहकारीसँग समन्वय नगरी सहारा नेपाल साकोससँग एकीकरणमा जाने निर्णय भएको संस्थाका अध्यक्ष कुमारमणि पोखरेलले जानकारी दिए /
खुल्ला अर्थतन्त्र अनि प्रविधिमैत्री वातावरणमा अघि बढ्नु आजको आवश्यक्ता भएकाले संस्था सहज रुपमै अघि बढिरहेको अवस्थालाई मध्यनजर गर्दै यसको अवतरणलाई सहज बनाएको संस्थाका अध्यक्ष पोखरेलले बताए । यो असहज परिस्थितीमा समेत संस्थाले आफ्ना सदस्यहरुलाई १८ प्रतिशत शेयर लाभांश वितरण गर्न लागेको जानकारी दिदै अध्यक्ष पोखरेलले पृथ्वी सहकारी संस्था अब सहारा सेवा केन्द्र सुरुङ्गा(ख) को नामबाट संचालनमा आउँने बताए । संस्थामा आवद्ध सम्पूर्ण शेयर सदस्यहरुलाई बिचल्ली नभइ सहारासँगको सहकार्यमा अघि बढ्न अनुरोध गर्दै अध्यक्ष पोखरेलले पृथ्वी सहकारीले दिएको सेवा भन्दा सहाराको सेवा सुविधा थप आकर्षक हुने प्रतिवद्धता जनाए ।
अध्यक्ष पोखरेलको सभापतित्व एवं कनकाई–३का वडाअध्यक्ष युवराज चम्लागाईको प्रमुख आतिथ्य रहेको कार्यक्रम सुरुङ्गा जेसीजको सभा हलमा सम्पन्न भएको हो ।
संस्थाका अध्यक्ष पोखरेलले संस्थाको तर्फबाट प्रगति प्रतिवेदन प्रस्तुत गरेका थिए । आजभन्दा ठीक ११ वर्षअघि स्थानीय केही सक्रिय युवाहरुको पहलमा सुरुवात गरिएको पृथ्वी सहकारी संस्थाले २०६९ को माघ २१ गतेदेखी औपचारिक रुपमा संस्था संचालनमा ल्याएको अध्यक्ष पोखरेलले जानकारी दिए । सदस्यहरुको दिगो विकास तथा सामाजिक उत्तरदायित्व “एकका लागि सबै र सबैका लागि एक” भन्ने मूल मान्यताबाट अभिप्रेरित भएर नै संस्था अघि बढेको बताउँदै अध्यक्ष पोखरेलले सहकारीका माध्यमबाट सामाजिक रुपान्तरणमा समेत सक्रिय रहँदै सहकारीले सामाजिक उत्तरादयित्व निर्वाह गरिरहेको बताएका छन् ।
साधारण सभाको अवसरमा विभिन्न विधामा संस्थाका उत्कृष्ट सदस्यहरु सम्मानित भएका छन् । यसरी सम्मानित हुनेहरुमा उत्कृष्ट बचत कर्ताका रुपमा पुरुष तर्फ कनकाई –३ का नारायणप्रसाद कट्टेल रहेका छन् । त्यस्तै उत्कृष्ट बचतमा महिला तर्फ नमिता पोखरेल रहेकी छन् । उत्कृष्ट ऋणिमा पुरुष तर्फ कनकाई ३ निवासी धर्मराज प्रसाईँ र महिला तर्फ कनकाई ७ की मिरादेवी शहनी रहेका छन् । त्यस्तै ज्येष्ठ नागरिक तर्फ कनकाई— ३ निवासी भगिरथा सिटौला सम्मानित भएका छन् ।
सम्मानित व्यक्तित्वहरुलाई कार्यक्रमका प्रमुख अतिथी कनकाई–३ का वडाअध्यक्ष चम्लागाई, जिल्ला सहकारी संघ झापाकी उपाध्यक्ष चम्पा खनाल सुवेदी, संस्थाका अध्यक्ष कुमारमणि पोखरेलले नगदसहित दोसल्ला र सम्मान पत्रका साथ सम्मान गरेका थिए ।
कार्यक्रमलाई सम्बोधन गर्दै प्रमुख अतिथि वडाअध्यक्ष चम्लागाईले पृथ्वी सहकारीले संस्थाको नारालाई सार्थक बनाउँने अभियानमा सक्रिय हुँदै आएको बताएका छन् । आर्थिक क्षेत्रमा भएको तरलतालाई हेर्दा देशको अर्थव्यवस्था कहाली लाग्दो भएपनि पृथ्वी सहकारीसँग अहिलेको अवस्थामा पनि एक करोड बढीको जगेडा कोष रहेको साथै १ करोड २८ लाख ६७ हजार ६ सयको शेयर पुँजी भएकाले संस्था आँफैमा सक्षम रहेको भन्दै प्रमुख अतिथी चम्लागाईले संस्थाको सफलताप्रति खुशी व्यक्त गरे । एक सफल एवं सक्षम संस्थाका रुपमा स्थापित भएको पृथ्वी सहकारी संस्थाले वर्तमान अवस्थाको सहकारीको भिडमा आगामी यात्राकालागी गरेको निर्णय थप स्वागत योग्य भएको टिप्पणी गर्दै कार्यक्रमका प्रमुख अतिथी चम्लागाईँले उपयुक्त समयमा भएको निर्णयले कसैलाई पनि पछुतो नहुने बताए ।
संस्थाका उपाध्यक्ष एल.पी. उप्रेतीको स्वागत तथा सचिव शिवकुमार कडेलले संचालन गरेको साधारण सभाको उद्घाटन समारोहमा प्रमुख अतिथी कनकाई ३ का वडाअध्यक्ष चम्लागाई सहित जिल्ला सहकारी संघ झापाकी उपाध्यक्ष चम्पा खनाल सुवेदीले संस्थाको सफलताको कामना गरेका थिए ।
