राम निरौला
कनकाई खबर \ नमुना विद्यालयको रुपमा प्रस्तावित झापाको कनकाई माविका विद्यार्थीहरुको साझा संगठन कनकाई भूतपूर्व विद्यार्थी समाजले सोमवार विद्यालय परिसरमा सांगीतिक कार्यक्रमसहित शुभकामना आदानप्रदान, पुस्तक विमोचन साथै पुर्व शिक्षकहरुलाई सम्मान गरेको छ ।
विद्यालयको २०३६ सालको व्याजका विद्यार्थी हाल कनकाई भूतपूर्व विद्यार्थी समाजका उपाध्यक्ष दिनेशकुमार उप्रेतीको सभापतित्व एवम् कनकाई नगरपालिकाका प्रमुख साथै कनकाई भूतपूर्व विद्यार्थी समाजका संस्थापक अध्यक्ष राजेन्द्रकुमार पोखरेलको प्रमुख आतिथ्यता रहेको कार्यक्रममा विद्यालयका पूर्व प्रधानाध्यापक सहित सेवा निवृत्त तीन दर्जन बढी शिक्षकहरुलाई सम्मान गरीएको छ ।
यसरी सम्मातिन हुने विद्यालयका पुर्व प्रधानाध्यापकहरु चन्द्रप्रसाद मैनाली, कोमलप्रसाद पोखरेल, ईश्वरीप्रसाद शिवाकोटी, आशा शर्मा शिवाकोटी, निर्मल खतिवडा लगायत अन्य शिक्षकहरु रहेका छन् । सम्मानित सवैलाई समाजका अध्यक्ष अखिलकुमार कोइराला, कार्यक्रमका सभापति दिनेशकुमार उप्रेती साथै कार्यक्रमका प्रमुखअतिथी राजेन्द्रकुमार पोखरेलले मायाको चिनोसहित, खादा र सम्मानपत्र प्रदान गरेका थिए ।
कार्यक्रमकै अवसरमा माहाकाव्यकार मीत्रप्रसाद दहालको “आमा”महाकाव्य लोकार्पण गरिएको थियो । साहित्यकार एवम् समालोचक कोमलप्रसाद पोखरेलले कृतिको लोकार्पण गरेका हुन् । स्रष्टा दहालको १५० पृष्ठको महाकाव्यको कनकाई माविका शिक्षक भीमप्रसाद दहालले समिक्षा गरेका थिए । कृतिका लेखकको संघर्षको कथा समेटिएको महाकाव्यमा १७ सर्ग र ८५२ श्लोकहरु रहेको वताइएको छ ।
भूतपूर्व विद्यार्थी समाजका महासचिव महेन्द्र विश्वकर्माले स्वागत सहित औचित्यमाथि प्रकाश पारेको सम्मानसहितको कार्यक्रममा सम्मानित व्यक्तित्व कोमलप्रसाद पोखरेल र आशा शर्मा शिवाकोटी, विद्यालयका प्रधानाध्यापक कर्णवहादुर डाँगी लगायतले मन्तव्य राखेका थिए । पहिलो चरणको कार्यक्रम संचालन समाजका सदस्य एवम् शिक्षक तीर्थराज खरेलले गरेका थिए ।
नेपाल सरकार शिक्षा, विज्ञान तथा प्रविधि मन्त्रालयद्वारा नमुना विद्यालयको रुपमा छनौटमा परेको खुसियालीमा वृहत सांगीतिक कार्यक्रम समेत सम्पन्न भएको हो । नेपालकै उत्कृष्ट बाध्यबादकसहित राष्ट्रिय कलाकारहरुको प्रस्तुती रहेको कार्यक्रममा कनकाई तारा सन्ध्या ठटाल र पूर्व कनकाई तारा कृष्ण तिवारीको समेत प्रस्तुती रहेको वताइएको छ ।
गीतसंगीतको क्षेत्रमा राष्ट्रिय छबि बनाएका कनकाई माविका पूर्व विद्यार्थीहरु सुमित पाठक, सरोज कोइराला लगायतका कलाकारहरुको समेत प्रस्तुति रहेको कनकाई भूतपूर्व विद्यार्थी समाजका अध्यक्ष अखिलकुमार कोइरालाले वताएका छन् । सांगीतिक कार्यक्रमको संचालन विद्यालयका पूर्व विद्यार्थी एवम् कलाकार राजेश घतानीले गरेका थिए ।
