कनकाई खबर \ बिरुवा रोप्ने मात्र होइन, रोपेका विरुवाको गोडमेल साथै संरक्षण समेत गर्ने प्रतिवद्धता जनाउँदै आएको रोटरी क्लवअफ सुरुङ्गाले पवित्र कनकाई नदि परिसरमा रहेको कनकाई घाट क्षेत्रमा गोडमेल सहित वृक्षरोपण गरेको छ ।
मानवीय सेवामा समर्पित अन्तर्राष्ट्रिय सामाजिक संस्थाका रुपमा मान्यता प्राप्त क्लवले वातावरणको शुद्धतालाई समेत ख्याल गर्दै वृक्षरोपण कार्यक्रमलाई निरन्तरता दिएको क्लवका अध्यक्ष शिवकुमार कडेलले जानकारी दिए । तीन महिना अघि मात्र सोही कनकाई घाट क्षेत्रमा कपुर र बज्रदन्तीका विरुवा रोपण गरेको रोटरीले हाल सम्म पनि नियमित रुपमा हेरचाह र संरक्षण गर्दै आएको क्लवका अध्यक्ष कडेल बताउँछन् ।वोटविरुवाको संरक्षणमा विशेष प्राथमिक्ता दिँदै आएको कनकाई घाट समितिको समेत कार्यक्रममा सहभागीता रहेको बताइएको छ ।क्लवको वृक्षरोपण सहितको गोडमेल कार्यक्रमकालागी सुरुङ्गास्थित न्युरो फार्मेसीका संचालक सरोज ठाकुरबाट माक्स साथै ग्लोब्सको सहयोग उपलव्ध भएको बताइएको छ ।
विभिन्न सेवाका क्षेत्रमा सदस्यलाई जिम्मेवारी प्रदान गरेको रोटरीले सर्भिस प्रोजेक्ट अन्तर्गत गोडमेलसहितको वृक्षरोपण कार्यक्रम सम्पन्न गरेको हो । रोटरी एवं रोट्रयाक्ट क्लवअफ सुरुङ्गाको संयुक्त आयोजनामा क्लवको वार्षिक क्यालेण्डरमा भएको कार्यक्रमको निरन्तरता स्वरुप क्लवका पदाधिकारीसहित सदस्यहरुको उपस्थितीमा कार्यक्रम सम्पन्न भएको क्लवका पुर्व अध्यक्ष एवं सर्भिस प्रोजेक्ट चेयर कुमारमणि पोखरेलले जानकारी दिए ।
