काठमाडौं, २१ भदौ । काठमाडौं महानगरपालिका वडा नम्बर १६ का वडा अध्यक्ष मुकुन्द रिजालको पार्थिव शरीरमा महानगर प्रमुख बालेन्द्र शाह (बालेन) काठमाडौं महानगरको झण्डा ओढाएर श्रद्धाञ्जली अर्पण गरेका छन् ।
डेंगु संक्रमणपछि ग्राण्डी अस्पतालमा उपचारका क्रममा आज विहान निधन भएका रिजालको पार्थिव शरीर अन्तिम श्रद्धाञ्जलीका लागि अहिले राष्ट्रिय सभागृहमा राखिएको छ । रिजाललाई श्रद्धाञ्जली दिन महानगर प्रमुख राजु पाण्डेसहित केहिबेर अघि राष्ट्रिय सभागृह पुगेका हुन् । विभिन्न राजनीतिक दलका नेता, सरकारका प्रतिनिधि तथा सर्वसाधारणहरु पनि लामबद्ध भएर रिजालप्रति श्रद्धाञ्जली अर्पण गरिरहेका छन् ।
उनको पार्थिव शरीर १२ बजेसम्म राष्ट्रिय सभागृहमा राख्ने, १२ः३० बजेदेखि १ः३० बजेसम्म पशुपति मन्दिर परिसरमा अन्तिम श्रद्धाञ्जलीका लागि राख्ने र दिउँसो २ः३० बजे दाहसंस्कार गर्ने कार्यक्रम छ ।
रिजालको आज बिहान ७ः३० बजे काठमाडौंको धापासीस्थित ग्राण्डी अस्पतालमा उपचारका क्रममा निधन भएको थियो ।ग्राण्डी अस्पतालका मेडिकल निर्देशक डा. विनोद बिजुक्छेका अनुसार रिजालको निधन दुवै फोक्सोमा सिभियर निमोनिया (भाइरल निमोनिया) का कारण निधन भएको हो ।
