कनकाई खबर डेक्स \ नेपाली संस्कृति , संस्कार र परम्पराको संरक्षणकालागि सवै राजनीतिक दल एकै ठाउँमा उभिनु पर्ने भन्दै नेपाल कम्युनिष्ट पार्टी झापाका इञ्जार्ज एवम् पार्टीका केन्द्रीय सदस्य रबीन कोइरालाले मुलुकको ठूलो वा सानो पार्टीका नाममा कसैले पनि दम्भ या नैराश्यता देखाउँन नहुने बताएका छन् ।
झापाको सुरुङ्गास्थित जेसीज भवनमा नेपाल कम्युनिष्ट पार्टी कनकाई नगर कमिटीले आयोजना गरेको बृहत शुभकामना आदानप्रदान कार्यक्रमलाई सम्बोधन गर्दै कोइरालाले राष्ट्र र राष्ट्रियता भन्दा ठूलो हामी कोही पनि नभएको प्रष्ट पारेका छन् । कार्यक्रमको प्रमुख अतिथीका रुपमा रहेका कोइरालाले कसैको विचार, भावना फरक हुन सक्छ तर राष्ट्रलाई खण्डित गर्ने गतिविधीकालागि कसैलाई पनि छुट नभएको बताएका छन् । विभिन्न जातजाती, धर्म, संस्कृति बोकेका नेपालीहरुले सवै चाडपर्वहरुलाई साझा पर्वका रुपमा मान्नु पर्नेमा कोइरालाले जोड दिएका छन् ।
नेपाल कम्युनिष्ट पार्टी कनकाई नगर कमिटीका अध्यक्ष रविन्द्र लम्सालको सभापतित्व रहेको कार्यक्रममा प्रतिनिधी सभा सदस्य एल.पी. साँवा लिम्बूले युरोपीयन देशहरुमा एकआपसमा गोरु जुधाएर रमीता हेरे जस्तै नेपालमा राजनीतिक दलका नेताहरुलाई जुधाएर पत्रकारहरुले गलत प्रचारबाजी गरेको आरोप लगाएका छन् । खराब आचरण भएका केही पत्रकारहरुले आर्थिक प्रलोभनमा परेर राजनीतिक दलका नेताहरुलाई एकआपसमा राख्ने र कमजोरी पक्ष खोतल्ने गलत काम भइरहेकाले त्यस तर्फ सचेत हुन संघीय सांसद साँवाले सम्बन्धित सवैलाई अनुरोध गरेका छन् ।
मुलुकको पुर्वाधार विकासमा मात्र नभएर समग्र देशको उन्नती र प्रगतिकालागि छिमेकी राष्ट्रहरुसँग सहकार्य भइरहेको प्रष्ट पार्दै संघीय सांसद एल.पी.साँवाले सरकारको यो दुई वर्षे कार्यकाल विकास निर्माणको प्रारम्भसँगै संविधान कार्यन्वयनमा नै बितेको बताएका छन् ।
नेकपा कनकाई नगर कमिटीका सचिव विष्णु विमलीको संचालन तथा कनकाईका प्रचार विभाग प्रमुख कृष्ण खतिवडाले स्वागत गरेको कार्यक्रममा नेकपाका विभिन्न तहका कार्यकर्ता, जनप्रतिनिधी, विभिन्न राजनीतिक दलका प्रमुख तथा प्रतिनिधी, स्थानीय क्रियाशिल संघसंस्थाका प्रतिनिधीहरुको सहभागिता रहेको थियो । प्रदेश सभा सदस्यद्वय झलकसिंह दर्लामी, हिरा थापा, नेकपा १ नंं.प्रदेश कमिटीका स्कुल विभाग सदस्य रामचन्द्र थपलिया, नेकपा झापाका सचिव मणिकुमार साम्पाङ, जिल्ला कमिटी सदस्य एवम् कनकाई नगर प्रमुख राजेन्द्र पोखरेल, कनकाई वडा नं. २ का वडाअध्यक्ष परशुराम गिरी, राप्रपाका नारायण पोखरेल, रोटरी क्लव अफ सुरुङ्गाका अध्यक्ष कुमारमणि पोखरेल, संचारकर्मी सरोज कोइराला लगायतले मन्तव्य राखेका थिए ।
