झापा \ नेपाली कांग्रेसका महामन्त्री गगन थापाले आगामी महाधिवेशनबाट पार्टीको अहिलेको नेतृत्व बिदा हुने बताएका छन् ।
‘पार्टीको नेतृत्व ठिक भएन भनेर तपाईंहरू चिन्तै नगर्नुस’, झापाको धुलाबारीमा शनिबार आयोजित मेचीनगर नगर सम्मेलनको उद्घाटन कार्यक्रममा थापाले भने, ‘तपाईँहरू तलको समस्या मिलाउनुस्, हामी माथिको समस्या मिलाउँछौं, ढुक्क हुनुस्, अगामी महाधिवेशनबाट अहिलेको नेतृत्व बिदा हुन्छ ।’ महामन्त्री थापाले आज (शनिवार) नेपाली कांग्रेस कनकाई नगर समितले आयोजना गरेको नगर सम्मेलनलाई समेत सम्बोधन गरेका छन् ।
उनले पार्टीमा केही समस्या र अप्ठ्यारा भने अवश्य रहेको बताए । थापाले कांग्रेसमा पुनर्जागरण जरुरी भएको पनि औँल्याए ।
भर्खर आएका नयाँले २०८४ को चिन्ता लिएर कोकोहोलो मच्चाइरहेको उल्लेख गरेका थापाले कांग्रेसलाई २०८४ को चिन्ता पटक्कै नभएको बताए । केही समूहले कांग्रेसलाई नै निसाना बनाएर प्रहार गरिरहेको उनको टिप्पणी छ । तर, त्यो कुन समूह हो भन्ने उनले खुलाएनन् ।
‘एमालेलाई सडक किनारामा बसेर समस्या छ भन्दिए हुन्छ, अर्कोलाई टङटङ घण्टी बझाइदिए पुग्छ’, उनले भने,‘ कांग्रेसलाई त्यसो गरेर पुग्दैन, देश बदल्ने जिम्मा कांग्रेसको काँधमा छ ।’ कम्युनिस्टले समाजको विश्वास कहिल्यै नगर्ने उल्लेख गरेका थापाले नेपाली समाजले गुमाएको आत्मविश्वासलाई जगाएर कांग्रेसले देश बदल्ने विश्वास दिलाए । कांग्रेससँग युवा र तन्नेरी पुस्ता रिसाएको बताएका उनले तन्नेरी पुस्तालाई भेटेर फकाउन नेता कार्यकर्तालाई आग्रह गरे ।
‘समाजको विश्वास डगमगाएको छ, आत्मविश्वास गुमेको छ’, महामन्त्री थापाले भने, ‘डगमगाएको विश्वास, गुमेको आत्मविश्वास जगाएर १५ वर्षभित्र देश बदल्नु र बनाउनु छ ।’ देश अब १५ वर्ष मात्र जवान रहने उनको तर्क छ । महामन्त्री थापाले भने, ‘अघिल्ला पाँच वर्ष आधार वर्ष र पछिल्ला पाँच वर्ष उचाइको वर्ष बनाउन चुकियो भने देश बन्दैन ।’ चार वर्षको चिन्ता छोडेर कांग्रेसले अहिलेको समयलाई देश बनाउने अवसरका रूपमा लिएको थापाले बताए ।
‘समाजमा छट्पटाहट छ,आक्रोश छ, नैराश्यता छ, तन्नेरीमा विदेशिने जोड छ, आमाबुबामा छोराछोरी विदेश ठेल्ने होड छ’, उनले भने, ‘कांग्रेसले यो कुरा मसिनो गरेर बुझेको छ, चार वर्षको चिन्ता छोडेर कांग्रेस देश बनाउन लागेको छ ।’ उनले २०८४ को चुनाव हार्दा कांग्रेसलाई केही फरक नपर्ने बताए ।
मुलुक विचित्रको समाजवादी भएको उल्लेख गर्दै थापाले भने, ‘मानिस समाजवादी, पार्टीको नाम समाजवादी, मोर्चा समाजवादी कस्तो विचित्र हो ?’ उनले संविधान नै समाजवादी भए पनि देश विकास नभएकोमा चिन्ता व्यक्त गरे । महामन्त्री थापाले निराश नबन्न र दृढ विश्वासका साथ अघि बढ्न नेता कार्यकर्तालाई आग्रह गर्दै आफूहरूकै पालामा देश समुन्नत हुने डाढस दिए ।
कांग्रेस मेचीनगर सभापति सुवेशकुमार पनेरु (सुदय) ले साङ्गठनिक प्रतिवेदन प्रस्तुत गरेको सम्मेलनमा सचिवद्वय मनोज घिमिरे र मुकेश लिम्बू साथै उपसभापति योगेन थापामगरले १४ औँ महाधिवेशनपछि नगर नेतृत्वले गरेका काम, नगरको आगमी योजना र नगर पार्टीको वर्तमान अवस्थाका बारेमा प्रष्ट्याएका थिए ।
मेचीनगर नगर सम्मेलनमा कांग्रेस केन्द्रीय सदस्य गोमा भट्टराई, कोसी प्रदेश सदस्य विमल आचार्य, प्रदेश सांसद गोपाल तामाङ, झापा सभापति देउकुमार थेवे, उपसभापति केशवराज पाण्डे साथै झापा १ का क्षेत्रीय सभापति इन्द्र बुढाथोकीले आआफ्ना धारणा राखेका थिए ।
