कनकाई, १२ असोज / नारी कल्याण समाजको आयोजना एवम् गुड नेवर्स इन्टरनेशनल नेपालको आर्थिक सहयोगमा एक महिनादेखी कनकाई नगरपालिकामा संचालनमा रहेको खुकुरी तथा जुत्ता चप्पल बनाउँने तालिमको आइतवार एक विशेष कार्यक्रमका विच समापन भएको छ ।
स्थानीय स्तरमा नै सिप सिकेर स्वरोजगार बन्न सक्ने विश्वासका साथ संचालन गरिएको तालिमवाट कनकाई नगर क्षेत्रका २० जना स्थानीयवासी लाभान्वीत भएको बताइएको छ । कनकाई ८ स्थित लक्ष्मीपुरमा एक महिनासम्म चलेको तालिममा जुत्ता चप्पल तर्फ १४ जना र खुकुरी तर्फ ६ जनाले सहभागिता जनाएका थिए । तालिममा सिकेका कुराहरुलाई व्यवहारमा उतारेर स्वरोजगार बन्नु पर्नेमा जोड दिँदै समापन कार्यक्रमका सहभागीहरुले उत्पादन भएका चिज बस्तुको बजारको सुनिश्चितता हुनु पर्ने बताएका छन् ।
नारी कल्याण समाज झापाकी अध्यक्ष कमला उप्रेतीको सभापतित्व एवम् जिल्ला समन्वय समिति झापाका प्रमुख सोम पोर्तेलको प्रमुख आतिथ्यतामा सम्पन्न समापन कार्यक्रमलाई सम्वोधन गर्दै प्रमुख अतिथी पोर्तेलले हामी समृद्ध बन्नकालागि उद्यमशिल बन्नु पर्ने तर्फ जोड दिएका छन् । सरकारले पूर्वाधार विकासमा मात्र ध्यान दिने तर उद्यमशिलताकालागि लगानी नगर्ने हो भने मुलुकको आर्थिक अवस्था कमजोर हुन सक्ने भएकाले यस तर्फ स्थानीय सरकार समेत सचेत हुन जिल्ला समन्वय समिती झापाका प्रमुख पोर्तेलले सुझाव दिएका छन् ।
एक महिना सम्म संचालन भएको तालिम कार्यक्रमको जुत्ता चप्पल तर्फ निरु पाण्डेले र खुकुरी तर्फ रनकुमार विश्वकर्मले सहजीकरण गरेका थिए । नारी कल्याण समाजकी सदस्य हर्कमाया विश्वकर्मले स्वागत तथा सचिव प्रेमा भट्टराईले संचालन गरेको कार्यक्रममा कनकाई नगरपालिकाका प्रमुख राजेन्द्र पोखरेलले सुखी नेपाली र समृद्ध नेपालको अभियान सफल पार्न सिपमूलक स्वरोजगार बन्न नगरवासीलाई अनुरोध गरेका छन् ।
एक महिना सम्म संचालन भएको जुत्ता चप्पल साथै खुकुरी बनाउँने तालिम समापनसँगै सहभागीहरुले सिकेका सिपलाई व्यवहारमा उतार्न स्थानीय सरकारको तर्फवाट आवश्यक्ता अनुसार सहयोग गर्ने कनकाई नगरपालिकाका प्रमुख पोखरेलले प्रतिवद्धता जनाएका छन् । तालिम समापन कार्यक्रममा कनकाई नगरपालिकाकी उपप्रमुख मन्जु प्रसाई, कनकाई १ का वडाअध्यक्ष रोशन पोखरेल, वडा नं.४ का अध्यक्ष गोविन्दप्रसाद पौडेल, वडा नं.८ का अध्यक्ष प्रेमवहादुर कटुवाल, गुड नेवर्स इन्टरनेशनल नेपालका प्रवन्ध निर्देशक गणेश ढकाल लगायतले मन्तव्य राखेका थिए ।
