कनकाई, १० असोज / “आन्तरिक पर्यटन प्रवर्धन गरौं, नेपाल भ्रमण वर्ष २०२० सफल पारौं” भन्ने अभियानका साथ विश्व पर्यटन दिवसको अवसर पारेर झापाको कनकाईमा शुक्रवार मिनी म्याराथन दौड प्रतियोगिता सम्पन्न गरिएको छ ।
सुरुङ्गा जेसीज र रोटरी क्लव अफ सुरुङ्गाको संयुक्त आयोजनामा सम्पन्न कार्यक्रममा नेपाल प्रहरीले समेत सहकार्य रहेको थियो । खेलकुदको माध्यमवाट युवाहरुलाई दुव्र्यसनवाट समेत मुक्त राख्ने उद्येश्यका साथ आयोजना गरिएको दौड प्रतियोगिता दुर्गापुर चौकवाट सुरु भई सुरुङ्गा चौकमा पुगेर समापन भएको थियो ।
महिला र पुरुष गरी एकसय बढी युवाहरुको सहभागिता रहेको प्रतियोगितामा धरानका किरण लिम्बू प्रथम, मोरङ मधुमल्लाका याङदेव राई दोस्रो, धरानका युवराज लिम्बू तेस्रो भएको कार्यक्रम संयोजक सुरुङ्गा जेसीजक केशव शिवाकोटीले वताएका छन् ।
त्यस्तै महिला तर्फ कनकाई ४ की रुपा दहाल प्रथम, कनकाई ४ कै सुस्मीता चौधरी दोस्रो र कनकाई ३ की सरीता सेर्पा तेस्रो भएकी छन् । विजेता सवैलाई कार्यक्रमका प्रमुख अतिथी जिल्ला प्रहरी कार्यालय झापाका प्रमुख दिनेशराज मैनालीले क्रमशः रु.७ हजार, ५ हजार र ३ हजार नगद र प्रमाण पत्र प्रदान गरेका थिए । नजिकै आइरहेका चाडपर्वहरु ढुक्कसँगले मनाउँनकालागि सबैलाई अनुरोध गर्दै झापाका प्रहरी प्रमुख मैनालीले जनताको शान्ती सुरक्षाकालागि नेपाल प्रहरी चौविसै घण्टा सेवामा तयार रहेको जानकारी दिएका छन् ।
रोटरी क्लव अफ सुरुङ्गाका अध्यक्ष कुमारमणी पोखरेलको सभापतित्वमा सम्पन्न दौड प्रतियोगिताको समापन कार्यक्रममा सुरुङ्गा जेसीजका अध्यक्ष कमल कट्टेलले स्वागत गरेका थिए । सुरुङ्गा जेसीजक महासचिव प्रविन तिम्सिनाले संचालन गरेको कार्यक्रममा कनकाई ३ का वडाअध्यक्ष रुद्रप्रसाद चिमरीया, समाजसेवीहरु भीमप्रसाद अधिकारी,दुर्गाप्रसाद प्रसाईं लगायतले मन्तव्य राखेको कार्यक्रम संयोजक रोटरी क्लवका सदस्य अर्जुन वोहोराले वताएका छन् ।
