कनकाई, ११ असोज / कनकाई नगरपालिका–७ स्थित दुर्गापुर बजारको स्वर्ण महोत्सव वर्ष २०७६ को शनिवार विधिवत रुपमा उद्घाटन भएको छ ।
कार्यक्रमका प्रमुख अतिथी प्रतिनिधी सभा सदस्य झापा क्षेत्र नं.४का सांसद एलपी साँवा लिम्बूले ५० वटा दिप प्रज्वलन गरी स्वर्ण महोत्सवको समुद्घाटन गरेका हुन् । वि.सं.२०२६ साल असोज १२ गते आइतबारदेखि प्रारम्भ भएको दुर्गापुर बजार ५० बर्ष पुगेको अवसरमा स्थानीयवासीले स्वर्ण महात्सवको आयोजना गरेको वताइएको छ । दुर्गापुर बजार व्यवस्थापन समिति र वडा नं.७ को वडा समितिको संयुक्त आयोजनामा एक बर्षसम्म विभिन्न कार्यक्रमहरु गरेर स्वर्ण महोत्सव वर्ष मनाउँने निर्णय भए अनुसार शनिवार समुद्घाटन गरिएको हो ।
बजार व्यवस्थापन समितिका अध्यक्ष देवीप्रसाद भट्टराईको सभापतित्व तथा झापा क्षेत्र नं.४ का संघीय सांसद लालप्रसाद(एल.पी.)साँवा लिम्बूको प्रमुख आतिथ्यता एवम् झापा क्षेत्र नं.४(क) का प्रदेश सभा सदस्य माननीय झलकसिंह दर्लामीको विशिष्ट आतिथ्यतामा उद्घाटन समारोह सम्पन्न भएको हो । कार्यक्रममा कनकाई ७ का वडा अध्यक्ष लिलाबहादुर कन्दङवाले स्वागत तथा महोत्सवको औचित्य माथि प्रकाश पारेका थिए । वडा अध्यक्षले स्वर्ण महोत्सव बर्षको अवसरमा समृद्ध बजारको परिकल्पना सहित आवश्यक सडक, ढल निकास, विजुली बत्ती, हरियाली पार्क र सपिङ् कम्प्लेक्सको निर्माण जस्ता विशेष कार्य योजना रहेको धारणा राखेका थिए ।
स्वर्ण महोत्सव उद्घाटना समारोहका प्रमुख अतिथी साँवा र विशिष्ट अतिथी झलकसिंह दर्लामीले बजारको समुन्नत विकासको लागि सक्दो सहयोग गर्ने प्रतिवद्धता जनाएका छन् । कार्यक्रममा कनकाई नगर उपप्रमुख मञ्जु प्रसाई, नेकपा झापाका सचिव मणिकुमार साम्पाङ, नेपाली काँग्रेसका जिल्ला सदस्य गोपाल उप्रेती, दुर्गापुर वजारका संस्थापकद्वय हरिध्वज खत्री र गणेशप्रसाद पोखरेल, कनकाई ६ का वडाअध्यक्ष लक्ष्मीप्रसाद ओली, नेकपा कनकाई नगरका इञ्चार्ज गोपाल प्रसाई, समाजसेवी प्रल्हाद प्रसाद घिमिरे लगायतले शुभकामना मन्तव्य राखेका थिए । विभिन्न जातजातीहरुको आआफ्नै मौलिक परम्परा झल्कने सांस्कृतिक नृत्यहरु सहित सम्पन्न समुद्घाटन कार्यक्रमको संचालन डिल्लीराम चापागाँई र राजेन्द्र सिटौलाले गरेका थिए ।
