कनकाई खबर \ गौ हत्याको विरोधमा झापाको सुरुङ्गामा स्वतस्फुर्त रुपमा स्थानीय हिन्दुवादी सनातनीहरुले सद्भाव र्यालीसहित वृहत प्रदर्शन गरेका छन् ।
धर्म गुरुहरुसहित स्थानीय स्तरमा क्रियाशिल राजनीतिक दलका प्रतिनिधिहरु, क्रियाशिल सामाजिक संघसंस्थाका प्रमुख तथा प्रतिनिधिहरु, उद्योगी व्यवसायी, मुस्लीम युवाहरु सहितको र्याली बजार परिक्रमापछि कोणसभामा परिणत भएको थियो ।
सुरुङ्गा चोकबाट र्याली सुरु हुनु अघि विद्वान व्यक्तित्वहरु भागवत मन्जरी राधिका दासी, गोलोक गोबद्र्धन गौशाला सतासीधामका महन्त नन्दकिशोर भारद्वाज, साधुटारका व्यासाचार्य लक्ष्मीप्रसाद खतिवडा लगायत सहभागीहरुले सुरुङ्गा चोकमा गाईको पुजा गरेर बजार परिक्रमाको प्रारम्भ गरेका थिए । सयौंको संख्यामा उपस्थित हिन्दुवादी सनातनीहरुले गौ हत्यारालाई कार्वाही नहुन्जेल अभियानलाई निरन्तरता दिँदै जाने उद्घोष गरे ।
धर्मगुरुहरुले शंखधुनी साथै स्वस्तीवाचन सहित…सामाजिक सद्भाव कायम गर.., गौमाताको रक्षा गर…,गाई काट्न पाइदैन…, हत्यारालाई कार्वाही गर…, हिन्दु राष्ट्र हाम्रो सान…, नेपालीको पहिचान…जस्ता नारा लगाएका थिए ।
कोण सभालाई धर्म गुरुहरु भागवत मन्जरी राधिका दासी, गोलोक गोबद्र्धन गौशाला सतासीधामका महन्त नन्दकिशोर भारद्वाज, साधुटारका व्यासाचार्य लक्ष्मीप्रसाद खतिवडा, समानुपातीक तर्फका प्रदेश सभा सदस्य गोपालवहादुर विश्वकर्मा, समाजसेवी श्याम ओली, हिन्दु सनातनी सक्रिय युवा जविन तिम्सिना, सताक्षीधाम धार्मिक विकास संस्थाका पुर्व अध्यक्ष प्रसाद सुव्वा लगायतले सम्बोधन गरेका थिए ।
संविधानमा उल्लेख भएअनुसार राष्ट्रिय जनावर गाईको हत्यारालाई सजाय हुनु पर्ने माग राख्दै आक्रोशित बनेका हिन्दुवादी सनातनीहरुले वर्तमान अवस्थाको असहज परिस्थितीको श्रृजना राज्य पक्षबाटै भएको दावी गरे । यसबाट हुन जाने क्षतिको सम्पूर्ण जिम्मा वर्तमान सरकारले लिनु पर्ने भन्दै धर्म गुरुहरुले यहि भदौ १३ गते बुधबार जिल्ला प्रशासन कार्यालय झापामा ध्यानाकर्षण पत्र बुझाउँने कार्यक्रम रहेको बताएका छन् ।
स्थानीय हिन्दु सनातनी सक्रिय युवा जविन तिम्सिनाले कार्यक्रमको औचित्यमाथि प्रकाश पार्दै सद्भाव र्याली निकाल्नुपर्ने बाध्यात्मक परिस्थितीप्रति दुःख व्यक्त गरे । छोटो सुचनाका आधारमा राजनीतिक दलसहित विभिन्न संघसंस्थाका तर्फबाट ऐक्यवद्धता जनाउँदै कार्यक्रममा उपस्थित सम्पूर्ण हिन्दुवादी सनातनी महानुभावहरुप्रति युवा समाजसेवी तिम्सिनाले धन्यवाद ज्ञापन गरे। कार्यक्रमको सहजीकरण हिन्दु सनातनी युवा एवं सताक्षी संस्कृत पाठशालाका प्राचार्य मदनमोहन अधिकारीले गरेका थिए ।
