कनकाई खबर \ स्वार्थ भन्दा माथी सेवा भन्ने सिद्धान्तलाई आत्मसाथ गर्दै विश्वव्यापी रुपमा सामाजिक क्रियाकलाप गर्दै आइरहेको अन्तर्राष्ट्रिय सामाजिक संस्था अन्तर्गतको रोटरी क्लब अफ सुरुङ्गाले शनिवार रक्तदान कार्यक्रम सम्पन्न गरेको छ ।
क्लवको वार्षिक क्यालेण्डरका रुपमा रहेको रक्तदानमा ६ महिला सहित ५१ जनाले रक्तदान गरेको कार्यक्रम संयोजक एवं क्लवका सर्भिस प्रोजेक्ट मेम्बर दिपक कुँवरले जानकारी दिए । रगतको अभावलाई पूरा गर्न क्लवले रक्तदान कार्यक्रमलाई आफ्नो वार्षिक क्लालेण्डरका रुपमा व्यवस्था गरेको संयोजक कुँवर बताउँछन् ।
विभिन्न सेवाका क्षेत्रमा सदस्यलाई जिम्मेवारी प्रदान गरेको रोटरीले सर्भिस प्रोजेक्ट अन्तर्गत रक्तदान कार्यक्रम सम्पन्न गरेको हो । रोटरी क्लव अफ सुरुङ्गाको सर्भिस प्रोजेक्ट चेयरको जिम्मेवारी यस वर्ष क्लवका पुर्व अध्यक्ष कुमारमणि पोखरेललाई प्रदान गरिएको छ । रोटरीयन पोखरेलको नेतृत्वमा रहेको सर्भिस प्रोजेक्ट चेयरका सदस्यहरु कुँवर र सुस्मा न्यौपाने उप्रेती रहेका छन् ।
रोटरी एवं रोट्रयाक्ट क्लव अफ सुरुङ्गाको संयुक्त आयोजना रहेको कार्यक्रम कनकाई—३ सुरुङ्गास्थित कुमुदिनी भवनमा सम्पन्न भएको हो । क्लवका अध्यक्ष शिवकुमार कडेलको सभापतित्व एवं कनकाई नगरपालिकाका प्रमुख राजेन्द्रकुमार पोखरेलको प्रमुख आतिथ्य रहेको कार्यक्रममा स्थानीय क्रियाशिल संघसंस्थाका प्रमुख तथा प्रतिनिधिहरुको समेत उपस्थिती रहेको बताइएको छ ।
त्यस्तै क्लवका पुर्व अध्यक्षहरु कुमारमणि पोखरेल, टिकाप्रसाद जमरकट्टेल, सुशिलकुमार श्रेष्ठ, खेमप्रसाद प्रसाई सहित अन्य पदाधिकारी तथा सदस्यहरु साथै रोट्रयाक्टकी अध्यक्ष सारिका गिरी सहित पदाधिकारी एवं सदस्यहरुको समेत बाक्लो उपस्थिती रहेको बताइएको छ ।
कार्यक्रमलाई सम्बोधन गर्दै कनकाई नगरपालिकाका प्रमुख पोखरेलले रोटरी क्लवका सदस्यहरुले रोटरी वादको मूल आदर्शलाई मन, वचन र कर्मले मनन गरी समाजमा विभिन्न रचनात्मक मानवीय हितकालागी गरेको सेवामूलक कार्यहरुप्रति आँफू अत्यन्तै प्रभावित भएको बताए । निस्वार्थ ढंगले सेवाका क्षेत्रमा काम गर्ने संस्था रोटरी क्लवसँग कनकाई नगरपालिकाले हरेक क्षेत्रमा समन्वय गरेर काम गर्न चाहेको बताउँदै नगर प्रमुख पोखरेलले रोटरीबाट समाजमा क्रियाशिल अन्य संघसंस्थाले समेत समन्वय गरेर अघि बढ्न सकेमा सामाजिक एकता कायम हुने विश्वास व्यक्त गरे ।
कार्यक्रममा होटल व्यवसायी संघ क्षेत्रीय समिति सुरुङ्गा र होटल डिलाइटका तर्फबाट कुर्सी साथै अन्य व्यवस्थापनमा विशेष सहयोग पुगेको थियो भने कनकाईको वडा नं.—७ निवासी युवा समाजसेवी शिव काफ्लेले रक्तदान गर्ने सम्पूर्ण दाताकालागी सहयोग स्वरुप फ्रुटी उपलव्ध गराएको बताइएको छ ।
नेपाल रेडक्रस सोसाइटी विर्तामोड रक्तसंचार सेवाको प्राविधिक सहयोग रहेको कार्यक्रममा क्लवका प्रेसिडेन्ट नोमिनी लुवराज उप्रेतीले स्वागत मन्तव्य राखेका थिए । औपचारिक कार्यक्रमको संचालन रोटरीयन मेनुका उप्रेतीले गरेकी थिइन् ।
