कनकाई खबर \ गौ हत्याको विरोधमा धरान हिडेका हिन्दुवादी धर्मगुरुहरुलाई झापा प्रशासनले चारपानेमा रोकेपछि धर्मगुरुहरुले स्वस्तीवाचनसहित चारपानेमा सडक अवरुद्ध गरेका छन् ।
झापाका जिल्लास्तरीय धर्मगुरुहरु चढेको बस प्रशासनले रोकेपछि धर्मगुरुहरुले सडकमै विरोध जनाइरहेका छन् । शान्तिपूर्ण आन्दोलनमा हिडेको समूहलाई प्रहरीले रोकेपछि प्रहरी प्रशासन विरुद्ध चर्को नाराबाजी भइरहेको छ ।
झापाबाट जाँदै गरेको बस जिल्ला प्रशासन कार्यालयले चारपानेमा रोकेको हो । प्रशासनले बाटो छेकेर अघि बढ्न नदिएपछि हिन्दु धर्मावलम्बी धर्म गुरुहरुले गौ हत्या गर्न पाइदैन, हिन्दु राष्ट्र कायम गर, भन्दै नाराबाजी गरिरहेका छन् । शंख ध्वनीसहित विरोध जनाइरहेका उनीहरुले गौ हाम्रो आमा हुन् जस्ता नारा लगाउँदै गौ हत्यारालाई कारबाहीको माग गरेका छन् । उनीहरुको विरोधका कारण पूर्वपश्चिम राजमार्ग अवरुद्ध भएको छ ।
धरानमा प्रदर्शनका लागि हिडेका धर्मगुरु लक्ष्मीप्रसाद खतिवडाले संविधानले दिएको अधिकार प्रयोग गर्न राज्यले बञ्चित गर्नु दुःखद भएको बताए । उनले गौ हत्या बिरुद्ध आयोजित सभा बिथोलेर सरकारले हिन्दु धर्ममाथि प्रहार गरिरहेको आरोप लगाए ।
धरानमा केही दिन अघि गोरुको मासु खाएको भिडियो सामाजिक सञ्जालमा भाइरल भएको थियो । त्यसको बिरोधमा हिन्दु धर्मावलम्बीहरुले सोही स्थानमा शान्तिपूर्ण बिरोध प्रदर्शन गर्ने तयारी गरेका थिए । प्रदर्शनका क्रममा हुन सक्ने अप्रीय क्षति रोक्न जिल्ला प्रशासन कार्यालय सुनसरीले आज राती १२ बजेसम्मका लागि निषेधित क्षेत्र घोषणा गरेको छ ।
धरान नगरपालिकाभरी कुनैपनि जुलुस तथा सभा गर्न प्रशासनले रोक लगाएको छ । प्रशासनको अवरोधका बाबजुदपनि धरान जाँदै गरेका हिन्दु धर्मावलम्बी धर्म गुरुहरुलाई प्रत्येक जिल्लामा नै रोक्ने आदेश अनुसार प्रशासनले झापाका धर्मगुरुहरुलाई चारपानेमा रोकेको जनाएको छ । ।
