मोरङ- कोसी अस्पतालका पूर्व मेडिकल सुप्रिटेन्डेन्ट तथा ग्रिनक्रस अस्पतालका प्रसुति तथा स्त्रीरोग विशेषज्ञ डा. तपेश्वरलाल कर्ण पक्राउ परेका छन्
।मंगलबार बेलुका करिब साढे ५ बजे कटहरी गाउँपालिकास्थित एक महिलाको घरबाट बिक्री गरिएको शिशुलाई प्रहरीले उद्धार गरेपछि प्रसुति तथा स्त्रीरोग विशेषज्ञ डा. कर्णलाई पक्राउ गरिएको हाे।गत साउन ३२ गते शिशुकी आमाले प्रहरीसमक्ष शिशु विराटनगरको ग्रिनक्रस अस्पतालबाट बेपत्ता भएको किटानी जाहेरी दिएकाे जिल्ला प्रहरी कार्यालय, मोरङका प्रवक्ता तथा प्रहरी नायब उपरीक्षक रञ्जनकुमार दाहालले जानकारी दिए।सोही किटानी जाहेरीका आधारमा प्रहरीले कटहरीस्थित ४६ वर्षीया दिलमाया राजवंशीको घरबाट शिशुको सकुशल उद्धार गरेको हाे।
प्रहरीका अनुसार दिलमायाको छोरा सूर्यनारायण र बुहारी श्यामबत्तीबाट सन्तान नभएपछि शिशु खरिद गरी लगेका हुन्। दिलमायाको परिवारले डा. कर्ण, ग्रिनक्रस अस्पतालका सफाइ कर्मचारी सुधा राजवंशीमार्फत् शिशु खरिद भएको प्रहरी अनुसन्धानमा देखिएको छ।प्रहरी प्रवक्ता दाहालले दिलमायाको परिवारले ५० हजार रुपैयाँमा शिशु खरिद गरिएको कुरा आए पनि अनुसन्धानका क्रममा ५ लाख रुपैयाँमा खरिद भएको आशंका गरिएकाे बताए। यद्यपि पुष्टि भने भइसकेको छैन। यसबारे थप जानकारी आउन बाँकी रहेको प्रवक्ता दाहालले जानकारी दिए।ग्रिनक्रस अस्पतालमा गत असार १४ गते २६ वर्षीया अविवाहित युवतीले छोरी जन्माएकी थिइन्।
ती युवतीलाई असार १३ गते नै ग्रिनक्रसमा भर्ना गरिएको प्रहरीले जनाएको छ। युवतीबाट जन्मिएकी शिशुको १४ गते नै बिक्री भएको प्रहरी अनुसन्धानले जनाएको छ।युवती गर्भवती भएपछि उनका प्रेमीले विराटनगरस्थित ग्रिनक्रस अस्पताल नजिकैको एक मेडिकल क्लिनिकमा लगेका थिए। सो क्लिनिक पनि डा. कर्णको रहेको र सोही क्लिनिकमा परीक्षण गरिसकेपछि युवतीलाई प्रसूतिका लागि ग्रिनक्रसमा भर्ना गरिएको प्रहरी अनुसन्धानमा खुलेको छ।
अस्पताल भर्ना हुने क्रममा युवक र युवतीको नामसमेत फरक राखिएको थियो। सुनसरीको रामधुनी नगरपालिका ११ का बासिन्दा मानबहादुर तामाङ र फूलकुमारी तामाङको नाममा अस्पतालमा भर्ना गरिएकाे थियाे।डेलिभरीपछि युवकले युवती लिएर इटहरी पुगेका थिए। इटहरीमा युवतीलाई छाडेर युवक हिँडेपछि सुत्केरी अवस्थाकी युवती अलपत्र अवस्थामा पुगेकी थिइन्। उनले प्रेमीलाई जन्मिएकी शिशुबारे बुझ्न खोज्दा अस्पतालमा रहेका बताएका थिए।प्रेमी गुमनाम भएपछि युवतीले आफ्नो शिशु खोज्ने क्रममा प्रहरीसमक्ष किटानी जाहेरी दिएकी थिइन्।
डेलिभरी भएपछि अस्पताल तथा त्यहाँ कार्यरत नर्सले शिशु आफूलाई नदिएको गुनासो युवतीले गरेकी थिइन्।प्रहरीले अनुसन्धान गर्ने क्रममा ३५ हजार रुपैयाँमा डेलिभरी गराएका डा. कर्णसमक्ष सोधपुछ गरेका थिए। डा. कर्णले भने प्रहरीसमक्ष बच्चा अभिभावकलाई बुझाइएको बताउँदै आएका थिए।डेलिभरी गर्ने क्रममा डा. कर्णले सुरुमा युवतीसमक्ष ५० लाख रुपैयाँ माग गरे पनि ३५ हजार रुपैयाँ लिएर डेलिभरी गरेका थिए।
युवतीले आफ्नो बच्चा खोज्दै अस्पताल पुग्दा अस्पतालका अध्यक्ष कृष्ण खवासले ९ सय ५० ग्राम तौलको शिशुको स्वास्थ्य अवस्था गम्भीर भएको र सुविधासम्पन्न अस्पताल भर्ना गरिएको बताएका थिए।प्रहरी अनुसन्धानसँगै डा. कर्णको भूमिका शंकास्पद भेटिएपछि प्रहरीले उनी यसप्रकारको घटनामा लामो समयदेखि संलग्न रहँदै आएको खुलेको छ। प्रहरीका अनुसार अवैध रूपमा गर्भपतन गराउने र जन्मिएका शिशुकाे व्यवस्थापन गराउने जनाउँदै अभिभावकबाट मोटो रकम असुल्ने काममा संलग्न रहँदै आएका छन्।
यसप्रकारको घटनामा डा. कर्णले १ देखि ५ लाखभन्दा बढी रकम लिने गरेको कुरा खुलेकाे छ। अवैध रूपमा गर्भ बसेकाहरूलाई डा. कर्णसम्म पुर्याउने एक गिरोह नै सक्रिय रहेको हुनसक्ने प्रहरी अनुसन्धानमा देखिएको छ।प्रहरीले अस्पतालका कर्मचारी, नर्स, मेडिकल क्लिनिकमा कार्यरतहरूले अवैध गर्भ भएकाहरूलाई डा. कर्णसम्म पुर्याउने गरेको देखिएको जनाएकाे छ।
डा. कर्ण कोसी अस्पतालमा २०७० देखि ०७१ सम्म मेडिकल सुप्रिटेन्डेन्टका रूपमा काम गरेका थिए। देश सञ्चारबाट
