कनकाई \ कोशी प्रदेशका मुख्यमन्त्री उद्धव थापाले दलहरू मिलेर प्रदेश चलाउनुको विकल्प नरहेको बताएका छन् ।
झापाको कनकाई ३ स्थित कनकाई बहुमुखी क्याम्पस सुरुङ्गाको १४ औँ क्याम्पस सभाको उद्घाटन गर्दै उनले कोशी प्रदेशमा सरकारको स्थायित्व र विकासका लागि दलीय सहमति आवश्यक रहेको बताए । \ मुख्यमन्त्री थापाले भने, “अब कोशी प्रदेशमा दलहरू मिल्नुको विकल्प छैन, यो कुरा सबै दलहरूले बुझ्नुभएको छ । हामीहरूबीच भएको गठबन्धन पनि झिनो बहुमतको छ, यो झिनो बहुमतले सरकारलाई स्थायित्व दिन सक्दैन । तसर्थ सबै दल मिल्न जरुरी छ ।”
मुख्यमन्त्री थापाले यो गठबन्धनको झिनो बहुमतले सरकारको प्रगति र समृद्धिलाई पूर्णता दिन नसक्ने बताउँदै सरकारको स्थायित्वका लागि दलहरूबीच सहमति, सहकार्य र एकता अनिवार्य रहेको बताए । सरकार अब सबै दलहरूबीचमा सहमति, सहकार्य र एकता गरेर अघि बढ्ने उनले स्पष्ट पारे ।
कार्यक्रममा कनकाई बहुमुखी क्याम्पस संचालक समितिका अध्यक्ष प्रकाश चुडालले अध्यक्षको प्रतिवेदन प्रस्तुत गर्दै , अब बन्ने नयाँ संचालक समिति निर्माणकालागि जिम्मेवार सबैबाट सकरात्मक भुमिका रहने र योग्य कार्यसमिति बन्ने बताए । त्यस्तै कार्यक्रममा उपस्थित सबैलाई धन्यवाद ज्ञापन गर्दै आगामी दिनमा क्याम्पसको समग्र विकासका निम्ति स्थानिय , प्रदेश र संघिय तिनै तहको सरकार बाट सहयोग प्राप्तहुनेमा विश्वस्त रहेको अध्यक्ष चुडालले वताए ।
कार्यक्रममा क्याम्पस संचालक समितिका सदस्य सचिव एवं क्याम्पस प्रमुख विकासप्रसाद उप्रेतीले क्याम्पसको समग्र शैक्षिक अवस्थाका बारेमा प्रकाश पार्दै प्रशासनिक तथा आर्थिक बर्ष २०८०\२०८१ को अनुमानित बजेट प्रस्तुत गरेका थिए ।
कोशी प्रदेश सभाका सदस्य लखीदेवी गणेश, कनकाई नगरपालिकाका प्रमुख राजेन्द्रकुमार पोखरेल, नेपाली कांग्रेस झापाका सभापति देउकुमार थेबे, नेकपा एमाले कनकाई नगर कमिटी अध्यक्ष खडगप्रसाद प्रसाई, प्राध्यापक संघ कनकाईका अध्यक्ष् तुलसी कार्की, चन्दादाता शेरबहादुर थापा, कनकाई बहुमुखीक्याम्पसका कर्मचारी संगठन अध्यक्ष हरि ढकाल लगायतले शुभकामना मन्तव्य राखेका थिए ।
कार्यक्रममा उपस्थित सबैलाई स्वागत संचालक समितिका सदस्य खगेश्वर उप्रेतीले गरेका थिए भने कार्यक्रमको सञ्चालन कनकाई बहुमुखी क्याम्पसका सहायक प्रमुख शेरबहादुर बानियाले गरेका थिए ।
