कनकाई खबर / राष्ट्रिय युवा संघ नेपालले सुरु गरेको ‘एक युवा पाँच बिरुवा, एक कमिटी, एक वृक्षरोपण कार्यक्रम’ देश व्यापी अभियानका रुपमा संचालित छ ।
संरक्षण प्रकृतिको, सुरक्षा सन्ततिको भन्ने मूल नाराका साथ राष्ट्रिय युवा संघ नेपाल जिल्ला कमिटि झापाले प्रसिद्ध पर्यटकीय क्षेत्र कनकाईको जामुनबारी सामुदायिक वनको सिमसार क्षेत्रमा वृक्षरोपण गरेको हो । कार्यक्रम राष्ट्रिय युवा संघ कनकाई नगर कमिटि साथै युवा संघको वडा नंं. १ र वडा नं.२ को व्यवस्थापनमा सम्पन्न भएको हो । जामुनखाडीको सिमसार क्षेत्रमा विभिन्न जातका ५ सय बिरुवा रोपिएको संगठनका जिल्ला अध्यक्ष फुर्वा लामाले जानकारी दिए ।
जिल्ला अध्यक्ष लामाको अध्यक्षतामा भएको वृक्षरोपण कार्यक्रममा राष्ट्रिय युवा संघ नेपाल केन्द्रीय कमिटी सचिवालय सदस्य अनिता कन्दङवाको प्रमुख आतिथ्यता रहेको थियो । अमला, तेजपत्ता, म्याङ्गो स्टिक, कल्की फुल लगायत अन्य विभिन्न जातका विरुवा रोपण गरिएको राष्ट्रिय युवा संघ नेपालका प्रदेश सचिवालय सदस्य विनोद रानाले जानकारी दिए ।
राष्ट्रिय युवा संघ नेपाल क्षेत्र नं.४ झापाका संयोजक विश्वविजय खरेलले स्वागत गरेको औपचारिक कार्यक्रममा नेकपा एमाले कोशी प्रदेशका सचिवालय सदस्य हीराकुमार थापा, सल्लाहकार राजेन्द्रकुमार पोखरेल,युवा संघका केन्द्रिय सदस्य सागर पोर्तेल लगायतले शुभकामना मन्तव्य राख्दै युवा संघले देशमै सबैभन्दा धेरै विरुवा रोप्ने अभियान चलाएर वातावरणको शुद्धतामा थप सहयोग पुगेको बताए ।
नेकपा एमाले साथै राष्ट्रिय युवा संघ नेपालका विभिन्न जिम्मेवारीमा रहेका नेता एवं कार्यकर्ताहरुको बाक्लो उपस्थिती रहेको कार्यक्रमको संचालन जिल्ला कमिटि सचिवालय सदस्य डिल्लीराम पोखरेलले गरेका थिए ।
