कनकाई खबर \ झापाको कनकाई नगरपालिकाले यहि साउन १ गतेदेखी नगर क्षेत्रमा सुर्तीजन्य पदार्थको विक्रि वितरण तथा सार्वजनिक स्थलमा प्रयोग गर्न निषेध गरेसँगै अनुगमनलाई तिब्र बनाएको छ ।
नगरपालिकाको अनुगमन टोली बजार प्रवेश गरेसँगै अधिकांश व्यवसायीहरुले आ—आफ्नो व्यवसाय बन्द गरेका कारण नगरपालिकाको अनुगमन प्रभावकारी बन्न नसकेको अनुभव गर्न थालिएको छ । यसै क्रममा कनकाईको पुरानो बजारका रुपमा रहेको वडा नं.९ स्थित घैलाडुवा बजारमा सोमबार भएको अनुगमनमा अधिकांस व्यवसायीले आ—आफ्नो पसल बन्द गरेपछि अनुगमन प्रभावित बनेको हो । केही पसलबाट सुर्तीजन्य पदार्थ साथै म्याद गुज्रीएका खाद्य बस्तु, कसमेटिक सामानसहित अन्य विभिन्न सामान बरामत गरी नष्ट गरिएको छ ।
कनकाई नगरपालिकाकी उपप्रमुख आशा शर्मा शिवाकोटीको नेतृत्वमा नगरपालिकाका कर्मचारी, बजार व्यवस्थापन समिति, नगर बाल संजाल, सुरक्षाकर्मी सहितको टोलीले बजार अनुगमन गरेको हो । सुर्तीजन्य पदार्थको विक्रि वितरण तथा सार्वजनिक स्थलमा प्रयोग गर्न नियन्त्रण साथै निषेध गर्ने अभियान आँफैमा ठूलो चुनौती रहेको भएपनि कनकाई नगरपालिका हिम्मतका साथ अघि बढेको उपप्रमुख शिवाकोटीले बताएकी छन् । आगामी दिनमा बजार अनुगमनलाई थप व्यवस्थित बनाउँदै निरन्तरता दिँदै जाने उपप्रमुख शिवाकोटीले प्रतिवद्धता जनाएकी छन् ।
