शिवसताक्षी \ झापाको पर्यटकीय स्थल दोमुखा जाने सडक निर्माण भएको केही समय नवित्दै वर्षातका कारण भत्किएको छ ।
केही उत्छृखल व्यक्तिले सडकमा लगाइएको ह्युमपाइप थुनिदिदा पानीको वहावले सडकमा क्षति पुर्याएको शिवसताक्षी नगरपालिकाले जनाएको छ । जंगलबाट आएको पानी सडक माथिबाट नाघेर जाँदा कल्र्भड छेउमा सडकको केही भाग भत्किएको हो । सडक भत्किएको खबर पाउँना साथ शिवसताक्षी नगरपालिको टोली र इलाका प्रहरी कार्यालय झिलझिलेको टोली उक्त स्थानमा पुगेका थिए ।
टोलीले ह्युमपाइपमा बाँसको भाटा लगाई माटोले थुनेको भेटेपछि उच्छृङखल व्यक्तिको खोजी कार्य सुरु गरेको थियो । दोमुखा सडकमा बनाइएको ह्युमपाइपमा बाँसको भाटा र माटो लगाएर थुनिदिएका कारण पानीको बहाव बढेर सडकको केही भाग भत्किएको शिवसताक्षी नगरपालिकाका नगर प्रमुख मेगाहाङ्ग थोप्राले जानकारी दिए । सडक पूर्णरुपमा बनिसकेको छैन, सडकमा पर्ने कल्र्भडमा छेउको पर्खाल यस आर्थिक वर्षमा बन्नेछ र मात्र सडकले पूर्णता पाउनेछ । उनले भने, सडक भत्किदा हामीलाई पनि चिन्ताको विषय बन्यो तर उच्छृङ्खल व्यक्तिले ह्युमपाइप थुनिदिँदा प्राकृतिक रुपमा बग्दै आएको पानी सडकमा गई क्षति पुगेको हो । भत्किएको सडक पुनः निर्माण गरिने समेत नगर प्रमुख थोप्राको भनाई छ ।
ह्युमपाइप थुन्ने व्यक्ति फेला परिसेको वडा नं. १० का अध्यक्ष हर्क सिगुले जानकारी दिए । उनले पानी थुन्ने स्थानीय बासी भएको र उनले किन पानीको बहावलाई थुने भन्ने विषयमा सोधपुच गरेर यथार्थ के हो पत्ता लाग्ने बताए ।
शिवसताक्षी नगरपालिकाका इन्जिनियरले सडक भत्किनुमा नगरपालिका र निर्माण व्यवसायीको कमजोरी नरहेको जानकारी दिए । उनले कुनै व्यक्तिले व्यक्तिगत स्वार्थका लागि पानी थुनिदिता उक्त पानी सडकमा गई भत्काएको बताए ।
उक्त सडक सतासी निर्माण सेवाले निर्माण गरेको हो । सडकमा एक वर्षसम्म समस्या आए निर्माण कम्पनीले बनाइदिने सतासी निर्माण सेवाले जनाएको छ। सडक ४ करोड २४ लाख ८३ हजार लागतमा सडक कालोपत्रेको काम सम्पन्न भएको हो । सडक कालोपत्रेका लागि शिवसताक्षी नगरपालिकाको रु २ करोड २४ लाख र सङ्घीय समपूरक कोषको २ करोड रकम रहेको थियो ।
शिवसताक्षीको माईधारदेखि दोमुखासम्मको उक्त सडक कनकाई सिँचाई आयोजनाले वि.सं २०३३ सालमा निर्माण गरेको थियो । त्यस पश्चात अहिलेसम्म उक्त सडकको स्तरोन्नति हुन सकेको थिएन । करिब ४० वर्षपछि यो सडक बनेको हो ।
