कनकाई खबर \ नेपाल पुर्व प्रहरी संगठन कनकाई नगर समितिले वृक्षरोपण कार्यक्रम सम्पन्न गरेको छ ।
वृक्षरोपण गरेर वातावरणको शुद्धता साथै हरियाली बनाउँने उद्येश्यले कार्यक्रमको आयोजना गरिएको संगठनका नगर अध्यक्ष हरिप्रसाद सेडाईले बताए । यसलाई आफ्नो सामाजिक उत्तरदायित्व सम्झेर पुर्व प्रहरी संगठन कनकाईले वृक्षरोपण कार्यक्रमको आयोजना गरेको नगर अध्यक्ष सेडाई बताउँछन् । कनकाई सामुदायिक वन परिसरमा जादुल जातका १ सय १० वटा विरुवा रोपण गर्दै अध्यक्ष सेडाईले विरुवाको संरक्षण गर्ने समेत संगठनको तर्फबाट प्रतिवद्धता जनाए ।
विगत केही वर्षदेखि संगठित भइ सामाजिक गतिविधिमा समेत सक्रिय हुँदै आएका कनकाई नगर क्षेत्रका पूर्व प्रहरीहरु संगठन विस्तारमा क्रियाशिल हुँदै आएका छन् । समाजको हितकालागी निस्वार्थ ढङ्गले काम गर्न कुनै पनि अवसर वा कुनै दिवस नै पर्खनु पर्छ भन्ने छैन, भन्ने तर्क राख्दै संगठनका सचिव अम्बर लिम्बूले संगठनको तर्फबाट अन्य कुनै कार्यक्रम नभई वातावरणको संरक्षण गर्नु प्रत्येक नागरिकको दायित्व भएको महशुस गर्दै वृक्षरोपण कार्यक्रमको आयोजना गरेको बताए ।
देशमा शान्तीसुरक्षा कायम राख्ने जिम्मेवारीका साथ लामो समय सम्म राष्ट्र सेवामा क्रियाशिल रहेर अनुभव प्राप्त पूर्व प्रहरीहरुको यो संगठनले कनकाई नगरमा क्रियाशिल रहेका सम्पूर्ण सामाजिक संघसंस्थाहरुको नेतृत्वदायी भूमिकामा रहेर कार्य सम्पदान गर्नु पर्नेमा सहभागीहरुले जोड दिए ।
कार्यक्रमलाई सम्वोधन गर्दै नेपाल पूर्व प्रहरी संगठन झापाका पुर्व अध्यक्ष खेमराज कार्कीले समाजमा शान्ती सुरक्षा कायम राख्दै मुलुकको समृद्धिकालागि पूर्व प्रहरीहरुको संगठन वर्तमान अवस्थामा अतिआवश्यक भएको वताएका छन् । संगठनले लागुऔषध साथै दुव्र्यसनीको न्युनिकरण, वातावरणको शुद्धताकालागी वृक्षरोपण, बजार सरसफाई लगायत विभिन्न सचेतनामूलक सामाजिक गतिविधी संचालन गर्दै अघि बढ्नु पर्ने झापाका पुर्व अध्यक्ष कार्कीले सुझाव दिएका छन ।
नेपाल पुर्व प्रहरी संगठन कनकाई नगर समितिका अध्यक्ष हरिप्रसाद सेडाईको सभापतित्व एवं सब डिभिजन वन कार्यालय सुरुङ्गाका प्रमुख नथुनीगोहिबार यादवको प्रमुख आतिथ्य रहेको वृक्षरोपण कार्यक्रममा ईलाका प्रहरी कार्यालय सुरुङ्गाका प्रमुख अशोक कोइराला, ट्राफिक प्रहरी सुरुङ्गाका प्रमुख डाइमन ज्योती घिमिरे लगायतले वृक्षरोपणसँगै संरक्षण्मा विशेष ध्यान दिनु पर्ने तर्फ जोड दिए । संगठनका सल्लाहकार संयोजक पदमप्रसाद मैनालीले स्वागत गरेको औपचारिक कार्यक्रमको संचालन सचिव अम्बर लिम्बूले गरेका थिए ।
