कनकाई खबर \ झापाको काँकरभिट्टामा मुख्य कार्यालय रहेको नेपाल बहुउद्देश्यीय सहकारी संस्था लि.(एनएमसी)मा ठाकुरप्रसाद शिवाकोटी नेतृत्वको टिमले औपचारिक रुपमा पदभार ग्रहण गरेको छ ।
झापासहित इलाम र मोरङ जिल्लामा समेत गरी ५८ वटा सेवा केन्द्रबाट वित्तिय कारोबार संचालन गर्दै आएको एनएमसीले बिर्तामोडको बिर्ता पार्टी प्यालेसमा शनिवार आयोजित एक विशेष समारोहका विच पदहस्तान्तरण कार्यक्रम सम्पन्न गरेको हो । आगामी कार्यकालकालागी नवनिर्वाचित अध्यक्ष ठाकुरप्रसाद शिवाकोटी लगायत कार्य समितिले सपथ ग्रहणसहित पदभार ग्रहण गरेका हुन् । यही जेठमा नयाँ कार्य समितिको निर्वाचन भएको थियो । संस्थापक अध्यक्ष रामचन्द्र उप्रेतीले अहिलेसम्म संस्थाको नेतृत्व गर्दै आएका थिए । चार वर्षे कार्यकाल रहेको समितिमा अब शिवाकोटी नेतृत्वको कार्यसमितिले एनएमसीको सञ्चालन गर्ने भएको छ ।
समितिको वरिष्ठ उपाध्यक्षमा भगवती घिमिरे, उपाध्यक्षमा विष्णु गौतम, सचिवमा विकास उप्रेती, सहसचिवमा अम्बिकाप्रसाद ढकाल र सदस्यहरुमा राजु उप्रेती, पवित्रा न्यौपाने, हरिप्रसाद आचार्य, कुन्तादेवी खनाल, रामप्रसाद भट्टराई, सीताकुमारी श्रेष्ठ, दुर्गाप्रसाद भट्टराई, सावित्रा दाहाल भट्टराई, देवीप्रसाद उप्रेती र प्रेमप्रसाद मैनाली सर्वसम्मत चयन भएका छन् । संस्थाको लेखा सुपरीवेक्षण समितिको संयोजकमा रचना दाहाल साथै सदस्यमा फाल्गुणी दाहाल र एकेन्द्र उप्रेती चयन भएका छन् । निवर्तमान अध्यक्ष रामचन्द्र उप्रेती संस्थाको नयाँ व्यवस्था अनुसार कार्य समितिको वरिष्ठ सदस्यको रुपमा रहने बताइएको छ ।
कार्यक्रममा निर्वाचन समिति संयोजक हरिचरण शिवाकोटीले संस्थाका अध्यक्ष शिवाकोटी नेतृत्वको कार्यसमिति तथा लेखा सुपरिवेक्षण समितिलाई पदस्थापना तथा सपथ ग्रहण गराएका थिए । निर्वाचन समितिका सदस्य टीका प्याकुरेलले स्वागत गरेको कार्यक्रममा सहारा नेपाल साकोसका प्रमुख कार्यकारी अधिकृत महेन्द्रकुमार गिरी, प्रदेश रजिस्टार हरिबहादुर खत्री लगायतको उपस्थिति रहेको थियो ।
संस्थाका निबर्तमान अध्यक्ष रामचन्द्र उप्रेतीको अध्यक्षतामा भएको कार्यक्रममा सहकारी विभागका रजिस्टार नवराज घिमिरेको प्रमुख आतिथ्य रहेको थियो । कार्यक्रममा निबर्तमान अध्यक्ष उप्रेतीले सातौं संचालक समितिका तर्फबाट २०७६ साउन १ गतेदेखी २०८० असार मसान्त सम्मको कार्यकालको समिक्षात्मक मन्तव्य राखेका थिए । वि.सं. २०५० मा स्थापना भएको संस्था एनएमसीका संस्थापक अध्यक्ष समेत रहेका उप्रेतीले स्थापनाकालदेखी नै सधैं अग्रणी सहकारी संस्थाको रुपमा रहेर समाजमा बेग्लै पहिचान बनाएको बताए । एक लाख ५२ हजार ३ सय ४५ सदस्य संख्या रहेको एनएमसीको हाल सम्मको चुक्ता शेयर पुँजी एक अर्ब, ३९ करोड, ९६ लाख, ५६ हजार रहेको अध्यक्ष उप्रेतीले जानकारी दिए । बचत तथा ऋण व्यवसाय सहित ५ वटा विभिन्न व्यवसाय संचालन गर्दै आएको एनएमसीमा ९ अर्ब भन्दा बढी निक्षेप र १० अर्ब ५० करोड भन्दा बढी कर्जा परिचालन भइरहेको बताइएको छ ।
निर्वाचन समितिको कार्यक्रमको सञ्चालन समितिका सदस्य लोकराज ढकालले गरेका थिए भने संस्थाको औपचारिक कार्यक्रमको सञ्चालन कार्यकारी प्रमुख लक्ष्मी उप्रेतीले गरेका थिए ।
