अर्जुनधारा \ झापाको अर्जुनधारामा तीन दिवसीय लेखनसीप सम्बन्धी कार्यशाला सुरु भएको छ । अर्जुनधारा नगरपालिकाको आयोजना तथा टाइम्स मिडिया नेटवर्कको सहजीकरणमा कार्याशाला सुरु भएको हो ।
अर्जुनधारास्थित पितृमोक्ष भवनमा आयोजित लेखनसीप कार्यशालामा नगर क्षेत्रका ४० जनाभन्दा बढीको सहभागिता रहेको छ । वडा कार्यालयहरुको सिफारिसमा सहभागीहरुलाई न्यायिक समिति सम्बन्धी लेखनसीप प्रदान गरिने अर्जुनधारा नगरपालिकाले जनाएको छ ।
कार्यशालाको उद्घाटन सत्रमा बोल्दै नगर उपप्रमुख खड्गमाया पराजुलीले न्याय निरुपणका लागि लेखनसीप अपरिहार्य भएको बताइन् । उनले गाउँघरमा सामान्य कागज बनाउन पनि समस्या भइरहेकोले नगरका तर्फबाट लेखनसीपको आयोजना गरिएको जानकारी दिइन् ।
कार्यक्रममा बोल्दै प्रमुख अतिथि पराजुलीले कागज लेख्न नजान्दा धेरेले क्षति व्यहोर्नु परेको बताइन् । उनका अनुसार गाउँ समाजमा सबैखाले लिखत तयार गर्न सक्षम बनाउने गरी कार्यक्रमको आयोजना गरिएको हो । तीन दिने बसाईलाई प्रभावकारी र उपलब्धीमुलक बनाउन उनको आग्रह थियो ।
यस्तै, प्रमुख प्रशासकीय अधिकृत गीता कुमारी राईले लेखनसीपको आवश्यकतालाई मध्यनजर गरेरै कार्यशालाको आयोजना गरिएको बताइन् । उद्घाटन सत्रमा मन्तव्य राख्दै उनले मेलमिलापकर्ताहरुको लागि अत्यन्तै फलदायी कार्यक्रम रहेको र अन्य सहभागीहरुका लागि पनि उत्तिकै महत्वपूर्ण भएको उनको भनाई थियो ।
प्रमुख प्रशासकीय अधिकृत राईले तालिमका लागि तालिम मात्रै हुने गरी सहभागी हुनुको अर्थ नहुने भन्दै हरेक क्षेत्रमा आवश्यक पर्ने लेखनसीपको अवसर सदुपयोग गर्न आग्रह गरेकी थिइन् ।
कार्यशालामा अधिवक्ता हेमकला कट्टेल, मणि पराजुली लगायतले सहजीकरण गर्नेछन् ।
टाइम्स मिडिया नेटवर्कका सदस्य सुशिल दाहालको अध्यक्षतामा भएको कार्यशालाको समुद्घाटन कार्यक्रममा न्यायिक समिति सदस्य शर्मिला सुब्बा लगायतले शुभकामना मन्तव्य राखेका थिए । कार्यक्रममा वडा नं. ७ का वडाध्यक्ष गोविन्द खतिवडा, कानुन अधिकृत एलिना घिमिरे, न्यायिक शाखामा कार्यक्रम सहायक पाँचौं माया ऐर लगायतको आतिथ्यता रहेको थियो ।
