काठमाडौं । कैलालीमा आफ्नै बुहारीको हत्या आरोपमा सासुससुरा पक्राउ परेका छन् । २७ वर्षीया कौशी भन्ने कविता बुढाको हत्या गरेको आरोपमा गौरीगंगा नगरपालिका–१, गोप्का बस्ने ५२ वर्षीय डिल्लीसिंह बुढा र उनकै श्रीमती ५० वर्षीया लहरी बुढालाई प्रहरीले पक्राउ गरेको हो ।कविता यही जेठ १८ गतेबाट हराएको भन्ने निवेदनका आधारमा जिल्ला प्रहरी कार्यालय कैलालीबाट खटिएको प्रहरीले खोजी कार्य गरेको थियो ।
खोजी गर्ने क्रममा हत्या गरी गौरीगंगा नगरपालिका–१, केदारेश्वर सामुदायिक वनस्थित खाल्डोमा गाडेको अवस्थामा कविताको शव फेला परेको प्रहरीले जनाएको छ ।घरको काम नगर्ने, आफुखुसी गर्ने भनी निहुँ खोज्दै विवाद हुँदा भान्सा कोठामा रोटी पकाउँदै गरेकी कवितालाई डिल्लीले टाउकोमा दाउराको चिरपटले प्रहार गरेका थिए ।
त्यसपश्चात डिल्ली र उनकै श्रीमती लहरी मिलेर लासलाई डोकोमा हाली उक्त वनमा गाडेको प्रारम्भिक अनुसन्धानबाट खुल्न आएको प्रहरीले जनाएको छ ।लहरीलाई गत मंगलबार र फरार रहेका डिल्लीलाई भजनी नगरपालिका–३ सीमावर्ती क्षेत्रबाट शनिबार प्रहरीले पक्राउ गरेको हो ।साथै प्रतिवादी डिल्लीलाई लुकाई छिपाई राख्न सहयोग गर्ने भजनी नगरपालिका–४ बस्ने ४१ वर्षीय जयवीर बुढालाईसमेत प्रहरीले पक्राउ गरेको जनाइएको छ ।
