शिवसताक्षी \ झापाको शिवसताक्षीमा रहेको पूर्वकै प्रसिद्ध पर्यटकीय क्षेत्र दोमुखा सडक करिव चालिस वर्षपछि कालो पत्रे भएको छ ।
शिवसताक्षी नगरपालिका–१० स्थित माईधार–दोमुखा २ हजार ९ सय मिटर लामो सडक कालो पत्रे भएको हो । शिवसताक्षी नगरपालिकाबाट विनियोजित ४ करोड २४ लाख ८३ हजार २४५ रकमबाट कालो पत्रे सडक निर्माण सम्पन्न भएको बताइएको छ ।जसमा शिवसताक्षी नगरपालिकाको रु २ करोड २४ लाख ८३ हजार २४५ रुपैयाँ र संघीय समपूरक कोषको रु.२ करोड रकम रहेको छ । सडक ढलरहित ७ मिटर चौडाई कालोपत्रे भएको छ । जसमा तीनवटा बक्स कल्र्भड र दुई वटा ह्युमपाइप समेत निर्माण भएको छ ।
शिवसताक्षी नगरपालिकाका नगरप्रमुख मेगाहाङ्ग थोप्राले माईधार –दोमुखा सडक कालो पत्रे गर्नका लागी धेरै बाधा व्यवधानहरु बीच भएपनि कालो पत्रेको काम सम्पन्न भएको बताए । हाल कालो पत्रेको काम सम्पन्न भएको छ । सडकमा निर्माण भएका कल्भर्डहरु केही समय जाम गर्नु पर्ने भएकाले कल्भर्डको काममा समय लाग्ने नगर प्रमुख थोप्राको भनाई छ ।
नगर प्रमुख थोप्राले स्थानीय तह निर्वाचनमा आफ्नो चुनावी एजेन्डाको रुपमा पनि यो सडकलाई राखेका थिए । आफु नगरप्रमुख भएको करिब एक वर्षमा उक्त सडक कालो पत्रे गरेर नगर प्रमुख थोप्राले जनतासँग गरेको बाचा पुरा गरेका छन् ।
शिवसताक्षीको माईधारदेखि दोमुखासम्मको सडक खण्ड कनकाई सिँचाई आयोजनाले २०३३ सालमा निर्माण गरेको थियो । त्यस पश्चात अहिलेसम्म सो सडकको स्तरउन्नति हुन सकेको थिएन । करिव ४० वर्षपछि यो सडक कालोपत्रे भएको हो । कालो पत्रेको काम तोकिएको समय भित्रै निर्माण सम्पन्न गरेर कालो पत्रे सडक नगरपालिकालाई जिम्मा दिने निर्माण कम्पनी सतासी निर्माण सेवाले जनाएको छ । शिवसताक्षी नगरपालिकाकी उपप्रमुख नरमाया कार्कीले सडक निर्माण मापदण्ड अनुसार नै भएको बताइएकी छन् । सडक निर्माणका क्रममा केही कमी कमजोरी देखिएकाले पुनः त्यसलाई सच्याएर सडक निर्माण अगाडी बढाएका थियौं । उनले भनिन् सडक भित्र बनाइएका कल्भर्डहरुका साइडमा लगाइने वाल नक्सामा भन्दा बढी लगाउनु पर्ने भएकाले त्यसलाई संसोधन गरी पुरा वाल लगाएर काम गरिने बताइन् । हाल सडक कालो पत्रेको काम मात्र सकिएको छ । थप कल्भर्डहरुको काम सकिएपछि मात्र पूर्ण रुपले सडकको काम पुरा हुने उपप्रमुख कार्कीको भनाई छ।
सडक निर्माणमा वडा नं.१० ले विशेष निगरानी गरेको छ । शिवसताक्षी नगरपालिका वडा नं. १० का वडाअध्यक्ष हर्क सिगुले निरन्तर खबरदारी र निगरानीका बीच सडक कालो पत्रे भएको बताए । हामी दिनहुँ रुपमा सडकमै हुन्छौं । उनले भने, वडका काम बाहेकका समय सडकमै विताएका छौ । सडकमा पछि देखिने कमजोरीहरुलाई निर्माण गर्दै सुधार गर्नका लागिपरेका थियौ । केही कमजोरी देखिएकाले सुधार पनि गरेका छौ । मापदण्ड अनुसार नै बनेको अध्यक्ष सिगुको भनाई छ ।
माइधारबाट दोमुखा सम्म बाटो राम्रो नहुँदा यहाँ आउने पर्यटकहरुले सास्ती व्यहोर्नु परेको थियो । दोमुखा पर्यटकीय क्षेत्र जाने बाटो कालो पत्रे बनेपछि आन्तरिक तथा बाह्य पर्यटकहरुको संख्यामा थप बृद्धि हुने अपेक्षा गरिएको छ ।
