कनकाई खबर / झापाको कनकाई नगरपालिकाले सार्वजनिक स्थलमा गुट्खा, खैनी तथा चुरोट लगायतका सुर्तीजन्य पदार्थ बिक्रि वितरण तथा प्रयोगमा निषेध गर्ने निर्णय गरेको छ।
धार्मिक तथा पर्यटकीय क्षेत्रका रुपमा पहिचान बनाएको कनकाई नगरीलाई सफा, सुन्दर, व्यवस्थित र विकसित बनाउने अभियानमा लागेको कनकाई नगरपालिकाले यहि २०८० को साउन १ गतेदेखी सार्वजनिक स्थलहरूमा सुर्तीजन्य पदार्थ खैनी, चुरोट, गुट्खा लगायतको बिक्रि वितरण तथा प्रयोगमा निषेध गर्ने निर्णय गरेको बताइएको छ ।
यहि जेठ १७ गते बसेको नगर कार्यपालिकाको बैठकको निर्णयअनुसार नगर क्षेत्रभित्र सुर्तीजन्य पदार्थ बिक्रि वितरण तथा प्रयोगमा निषेध गर्ने निर्णय भएअनुसार सार्वजनिक रुपमा सुचना जारी गरेको नगरपालिकाका प्रशासकीय अधिकृत विवेक भण्डारीद्वारा हस्ताक्षर गरिएको सुचनामा जनाइएको छ ।
बन्द निषेधित धार्मिक तथा पर्यटकीय क्षेत्रका रुपमा रहेको नेपालकै पहिलो विद्युत चुहावट मुक्त नगर कनकाई नगरपालिकालाई व्यवस्थित र सभ्य बनाउने दायित्व नगरबासीकै भएकाले यो निर्णय कार्यान्वयनमा सबैको सहयोग अपरिहार्य रहेको भन्दै कनकाई नगरपालिकाका प्रमुख राजेन्द्रकुमार पोखरेलले सहयोगकालागी सबैलाई अनुरोध गरेका छन् । सूर्तीजन्य पदार्थको प्रयोगले हुने घातक रोगबाट नगरबासीलाई जोगाउँने उद्येश्यले आफ्नो पहिलो कार्यकालबाटै नगर प्रमुख पोखरेलले गुट्खा, खैनी तथा चुरोट लगायतका सुर्तीजन्य पदार्थ प्रयोगमा रोक लगाउँने विषयमा बारम्बार सार्वजनिक कार्यक्रमहरुमा सचेतना जगाउँदै आएका थिए ।
कनकाई नगर प्रमुख पोखरेलले नगरपालिका क्षेत्रमा भौतिक पूर्वाधारको विकाससँगै स्वास्थ्य, शिक्षा, कृषि तथा पशुपालन, युवा स्वरोजगार लगायतका कार्यक्रमहरु जनताले अनुभव गर्न सक्ने गरी संचालन गर्दै आएको बताए । नगर क्षेत्रमा भएका थप महत्वपूर्ण विषयको जानकारी गराउँदै नगर प्रमुख पोखरेलले फोहोरमैला व्यवस्थापन, फुटपाथ नियन्त्रण, सडक क्षेत्रमा पार्किङको व्यवस्थापन साथै बजार क्षेत्रलाई स्मार्ट चोक बनाउँने उद्येश्यले स्मार्ट लाइटको व्यवस्था जस्ता जनसरोकारका विषयलाई अभियानका रुपमा सञ्चालन गरिरहेको बताए ।
नगर प्रमुख पोखरेलले कनकाई नगर क्षेत्रभित्र प्रेसर हर्न नबजाइदिन समेत पटक पटक सरोकारवालाहरुलाई आग्रह गरेका छन् । ‘समुन्नत सम्पदा दिगो पूर्वाधार, समृद्ध कनकाईको मूल आधार’ भन्ने नारालाई आत्मासाथ गर्दै अघि बढेको कनकाई नगरपालिका हामी सबैको हो, यसलाई हामी सबै मिलेर व्यवस्थित र सभ्य पालिकाको रूपमा स्थापित गर्नुपर्छ, प्रमुख पोखरेलले भने, ‘शहर बजारको सुन्दरता र सभ्यतासित ध्वनि प्रदूषण पनि जोडिएको हुन्छ । नगरपालिकाले अघि सारेको अभियानमा सबैको साथ एवं सहयोग रहनेमा आँफू विश्वस्त रहेको नगर प्रमुख पोखरेलले कनकाई खबरसँगको कुराकानीमा बताए ।
