कनकाई खबर \ झापाको कनकाई नगर क्षेत्रको सामाजिक गतिविधिमा क्रियाशिल बंगाली समाज सेवा समितिले मनसादेवीको पूजाअर्चना सहित विविध साँस्कृतिक कार्यक्रम सम्पन्न गरेको छ ।
बंगाली भेषभुषामा सजिएका समुदायले विशेष पर्वको अवसरमा कनकाई ३, सुरुङ्गास्थित कालिस्थान टोलमा विशेष कार्यक्रमको आयोजना गरी कनकाई माइसम्मको कलशयात्रा समेत गरेका थिए । कनकाई माई नदीमा पुगेर ल्याएको शुद्ध जल मनसादेवीको मन्दिरमा अर्पण गरिएको कार्यक्रम संयोजक जन्मजय मण्डलले जानकारी दिए ।
बंगाली सेवा समाज कनकाईका अध्यक्ष पंकज मण्डलको सभापतित्व रहेको विशेष कार्यक्रममा कनकाई नगरपालिकाकी उपप्रमुख आशा शिवाकोटीको प्रमुख आतिथ्य रहेको थियो । समाजका उपाध्यक्ष दिगम मण्डलको स्वागत तथा सचिव रबिन मण्डल र मीना दासले संयुक्त रुपमा संचालन गरेको कार्यक्रममा सदस्य राजु मण्डलले कार्यक्रमको औचित्यमाथि प्रकाश पारेका थिए ।कार्यक्रममा बंगाली समुदायका बालबालिकाहरुले सहभागीहरुलाई नृत्यबाट समेत स्वागत गरेका थिए ।
कार्यक्रममा मनसा देवीको पुजा आरधनासँगै प्रणामी समुदाय वाइजुराज टिमबाट डडिया नृत्य, बंगाली समुदायबाट बंगाली नृत्य , ग्लोवल एडुकेयर एकाडेमीबाट तामाङ सेलो , हरिकुल नमुना अंग्रेजी माविबाट थारु नृत्य , सुरुङ्गा डान्स सेन्टरबाट साकेला नृत्य साथै झापा मेरीगोल्ड अंग्रेजी माविका विद्यार्थी सुवास पाठक र गायक भक्त विश्वासले समेत गायन प्रस्तुत गरेका थिए । कार्यक्रमकै अवसरमा समाजले आफ्नो ठाँउलाई फुटबल खेलको माध्यमबाट देश विदेसमा चिनाउन सफल भएको भन्दै स्थानीय रोहन कार्कीलाई सम्मान पत्रबाट सम्मान समेत गरेका थिए ।
औपचारिक कार्यक्रमका अवसरमा उद्योग वाणिज्य महासंघ कोशी प्रदेशका उपाध्यक्ष कुमारमणी पोखरेल , कनकाई धाम धार्मिक विकास संस्थाका अध्यक्ष शेरबहादुर थापा , नेपाली काँग्रेस कनकाई नगर सभापति दुर्गा प्रसाई ,माओवादी केन्द्रका नगर अध्यक्ष यमनाथ सेडाई लगायतले कार्यक्रमको सफलताको कामना गर्दै बंगाली समाजले आफ्नो संस्कार एवं संस्कृतिको संरक्षणमा देखाएको सक्रियताप्रति प्रशंसा गरे ।
कार्यक्रमलाई सम्बोधन गर्दै कनकाई नगरपालिकाकी उपप्रमुख आशा शिवाकोटीले देश दिगो विकासको लक्ष्यका साथ अघि बढेको भएपनि महिलाहरु आफ्नै कमजोरीका कारण अझै पनि हरेक कुरामा पछि परेकाले समाज रुपान्तरणमा समस्या आएको बताइन् । बंगाली समाजका महिलाहरु समेत एकजुट भएर सामाजिक क्षेत्रमा अघि बढ्न उपप्रमुख शिवाकोटीले जोड दिएकी छन् ।
नेपाल चार जात छत्तीस वर्णको साझा फुलबारी भएकाले सबैले आ–आफ्नो धर्मसंस्कृति एवं संस्कारलाई एकआपसमा जगेर्ना गर्दै अघि बढ्नु पर्ने तर्फ उपप्रमुख शिवाकोटीको जोड थियो । यस क्षेत्रमा विगत लामो समयदेखी बसोबास गर्दै आएका बंगाली समाजले आफ्नो संस्कार साथै संस्कृतिको संरक्षणमा देखाएको सक्रियताले अन्य समुदायलाई समेत प्रेरणा जगाएको भन्दै उपप्रमुख शिवाकोटीले माता मनसादेवीबाट सम्पूर्ण नेपालीमा एकता एवं सद्भावका साथ अघि बढ्ने शक्ति प्राप्त होस् भन्ने शुभकामना व्यक्त गरिन् ।
बंगाली समुदायले भदौ महिनाको पहिलो पञ्चमी तिथिलाई विशेष पर्वका रुपमा मनाउँछन् । बंगाली समुदायको परम्परा अनुसार चतुर्थी तिथिदेखि षष्ठी तिथिसम्म तीन दिनलाई विशेष पूजाअर्चनाका साथ मनाउँदै आएका छन् । भदौ महिनाको चतुर्थी, पञ्चमी र षष्ठी तिथिमा मनाइने यो पर्वलाई बंगाली समुदायले विशेष महत्वको पर्वका रुपमा लिने गरेको बंगाली समाज सेवा कनकाईका अध्यक्ष पंकज मण्डल बताउँछन् । माता मनसा देवीको विशेष पूजाअर्चना गरी यो पर्व मनाउने गरिएको मण्डलको बुझाई छ ।
मनसा देवीको पूजाअर्चनाबाट दुःख, कष्ट सबै नाश भएर जाने र मानिसका सबै मनोकामना पूर्ण हुने विश्वास गरिएको छ । भदौ महिनाको पहिलो पञ्चमीका दिन हुने मनसा देवीको यो विशेष पूजाअर्चनाकालागि एक दिन अघि चतुर्थीका दिनदेखि नै व्रत बस्ने चलन रहेको बताइएको छ ।
यो पर्वमा बंगाली समुदायका महिला मात्र होइन पुरुषहरूले समेत व्रत बस्ने र मनसा देवीको विशेष पूजाअर्चना गरी रातभर जाग्राम बस्ने चलन रहेको बंगाली समुदायका अगुवाहरु बताउँछन् । दिनभर व्रत बसेका व्रतालुहरूले चामलको पिठोबाट घिउमा पकाइएको विशेष परिकार (घाटरा पिठा) साथै फलफूलहरू प्रसादको रुपमा खाने चलन रहेको बताइएको छ ।
षष्ठिका दिन बिहान बलीपूजा गरेर चेलीबेटी, भान्जाभान्जी, आफन्त, साथीभाइलाई बोलाएर प्रसाद खुवाउने परम्परा रहेको सेवा समिति कनकाईका सचिव रविन मण्डलको भनाई छ । सोहीदिन बेलुका मनसा देवीको मूर्ति नदीमा लगेर विसर्जन गरेपछि यो पर्व समाप्त हुने गरेको बताइएको छ ।