युवा कवि मोतीराम भट्टको स्मृतिमा पुस्तक विमोचन

सुरुङ्गा \ युवा कवि मोतीराम भट्टको १५३ औं जन्मजयन्तीका अवसरमा कनकाई वहुमुखी क्याम्पस सुरुङ्गाको नेपाली विभागले सोमवार कविता प्रतियोगिता साथै साहित्यिक कार्यक्रम सम्पन्न गरेको छ ।
क्याम्पसको सभा हलमा सम्पन्न भएको कार्यक्रममा क्याम्पसका विद्यार्थीहरुले प्रतियोगितात्मक कविता वाचन गरेका थिए भने विभिन्न साहित्यिक स्रष्टाहरुले आफ्ना रचना प्रस्तुत गरेका थिए ।
कार्यक्रमका अवसरमा पण्डित देवनारायण उपाध्याय निरौला(शास्त्री) द्वारा रचना गरीएको कविता संग्रह ‘खोर्सानी’ को विमोचन गरीएको छ । कार्यक्रमका प्रमुख अतिथी समेत रहेका वरिष्ठ साहित्यकार एवम् सहप्राध्यापक कोमलप्रसाद पोखरेलले संग्रहको विमोचन गरेका हुन् ।
कृतिको समिक्षा गर्दै कनकाई वहुमुखी क्याम्पसका सह प्राध्यापक जीवनाथ सुवेदीले समाजमा रहेका विभिन्न किसिमका विकृती र विसंगतीहरुलाई न्युनिकरण गर्नका लागि खोर्सानी कविता संग्रहलाई सहयोगीका रुपमा लिन सकिने वताएका छन् । कनकाई ३ निवासी रामचन्द्र र गोमा निरौला ढुङ्गेलले प्रकाशन गरेको कृतिमा १९ वटा विभिन्न समयमा लेखिएका कविताहरु समेटिएको वताइएको छ ।

     क्याम्पसको नेपाली विभाग प्रमुख विष्णु कोइरालाको सभापतित्व एवम् वरिष्ठ साहित्यकार कोमलप्रसाद पोखरेलको प्रमुख आतिथ्यता रहेको कार्यक्रममा उपप्राध्यापक शेरवहादुर बानियाँले कार्यक्रमको औचित्यमाथि प्रकाश पार्दै कृतित्व र मोतीराम भट्टको जीवनीका वारेमा प्रष्ट पारेका थिए ।
नेपाली विभागका सदस्य दिनेश तिम्सिनाको स्वागत तथा कमला सुवेदीको संचालन रहेको कार्यक्रममा क्याम्पसका अध्यक्ष प्रकाश चुडाल, क्याम्पस प्रमुख विकास उप्रेती, डाक्टर पुण्यप्रसाद सिग्देल, टिका लामिछाने, प्रेम प्रभात, कृतिका स्रष्टा पण्डीत देवनारायण निरौला लगायतले मन्तव्य राखेका थिए ।

Facebook Comments