सुरुङ्गा जेसीजको अध्यक्षमा त्रिलोचन

 कनकाई खबर / सुरुङ्गा जेसीजको १२ औं साधारण सभा सम्पन्न भएको छ । साधारण सभावाट वर्ष २०२०को अध्यक्षमा त्रिलोचन उप्रेती सर्वसम्मत रुपमा निर्वाचित भएका छन् । जेसीजको विधान अनुसार अध्यक्षसहित दुईजना कार्यकारिणी उपाध्यक्ष, चारजना उपाध्यक्ष र एकजना जनसम्पर्क अधिकारी निर्वाचन प्रक्रियावाट निर्वाचित हुनु पर्ने भएकाले सोमवार सुरुङ्गा जेसीजको सभा हलमा सम्पन्न भएको अधिवेशनसहितको साधारण सभाको निर्वाचन प्रक्रियावाट नयाँ कार्यसमिति सर्वसम्मत रुपमा चयन भएको हो ।

   साधारण सभापछि निर्वाचन समितिका संयोजक सुरुङ्गा जेसीजका निवर्तमान अध्यक्ष भिमप्रसाद भट्टराईले निर्वाचन प्रक्रिया सार्वजनिक गरेसँगै आवश्यक संख्याभन्दा बढी उम्मेद्वारहरुको मनोनयन भएपछि राती अबेला सम्ममा सर्वसम्मतको सहमती जुटेको वताइएको छ । यसरी सर्वसम्मत रुपमा निर्वाचित भएका अध्यक्ष उप्रेतीसहित कार्यकारिणी उपाध्यक्षद्वयमा सुमन कार्की र प्रविन तिम्सिना रहेका छन् । त्यस्तै चारजना उपाध्यक्षमा क्रमशः अनमिका सिटौला मैनाली, बिनिता मैनाली बिमली, केशब शिवाकोटी र दिपेन्द्र प्रधान साथै जनसम्पर्क अधिकारीमा प्रतापवावु कट्टेल सर्वसम्मत रुपमा निर्वाचित भएको निर्वाचन समितिका संयोजक भिमप्रसाद भट्टराईले वताएका छन् ।

   निर्वाचन समितिका अन्य सदस्यहरु सुरुङ्गा जेसीजका पुर्व अध्यक्ष मोतिखर ओझा र सदस्य सोमनाथ उप्रेतीले सर्वसम्मत नेतृत्व चयनकालागि महत्वपूर्ण भूमिका खेलेको वताइएको छ । अध्यक्षमा निर्वाचित भएसँगै उप्रेतीले कानुनी सल्लाहकार, महासचिव र कोषाध्यक्ष जस्तो महत्वपूर्ण जिम्मेवारीमा तत्कालै मनोनित गरेका छन् । जस अनुसार कानुनी सल्लाहकारमा यदुका (उषा) उप्रेती, महासचिवमा अर्जुन बोहोरा र कोषाध्यक्षमा किशोर दहाल मनोनित भएका छन् । अध्यक्षवाट मनोनित हुने अन्य पदाधिकारीहरुको पूर्णता पदहस्तान्तरण कार्यक्रमसँगै हुने नवनिर्वाचित अध्यक्ष उप्रेतीले वताएका छन् ।

  सुरुङ्गा जेसीजका अध्यक्ष कमल कट्टेलको सभापतित्व एवम् पूर्वअध्यक्ष कुमारमणि पोखरेलको प्रमुख आतिथ्य रहेको साधारण सभामा पुर्वअध्यक्षहरु मोतीखर ओझा, शिवकुमार कडेल, सरला दहाल पोखरेल, जविन तिम्सिना लगायतले मन्तव्य राखेका थिए । कार्यकारिणी उपाध्यक्ष राजु पाठकले स्वागत तथा उपाध्यक्ष देवका उप्रेतीले आस्थावाचन गरेको कार्यक्रमको संचालन महासचिव प्रविन तिम्सिनाले गरेका थिए । साधारण सभाको बन्द सत्रले महासचिव तिम्सिना, कोषाध्यक्ष सुमन कार्की र सुरुङ्गा जेसीजको बोर्ड अफ ट्रस्टीजका संयोजक पुर्वअध्यक्ष शिव कडेलको प्रतिवेदन सर्वसम्मतले अनुमोदन भएको वताइएको छ ।

Facebook Comments